Од домашни растенија и градини, до полиња и шуми, зелената е бојата што најмногу ја поврзуваме со површинскиот живот на Земјата, каде што условите ја фаворизираат еволуцијата на организмите кои вршат фотосинтеза и произведуваат кислород, користејќи го зелениот пигмент хлорофил.
Но, планета слична на Земјата која орбитира околу друга ѕвезда може да изгледа многу поинаку, потенцијално покриена со бактерии кои примаат малку или воопшто не примаат видлива светлина или кислород, како во некои средини на Земјата - па, наместо тоа, користат невидливо инфрацрвено зрачење за да ја поттикнат фотосинтезата.
Наместо зелена, многу такви бактерии на Земјата содржат виолетови пигменти, а виолетовите светови на кои тие се доминантни ќе произведат карактеристичен „лесен отпечаток“ што ќе може да се открие со телескопи од следната генерација за земја и вселена, објавиле научниците од „Корнел“ во новото истражување.
- Виолетовите бактерии можат да напредуваат под широк опсег на услови, што ги прави еден од основните кандидати за живот кој би можел да доминира во различни светови - истакнала Лигија Фонсека Коељо, постдокторски соработник во Институтот „Карл Саган“ и прв автор на истражувањето „Виолетовата е новата зелена: биопигменти и спектри на виолетови светови слични на Земјата“.
- Треба да создадеме база на податоци за знаци на живот за да се погрижиме нашите телескопи да не ги пропуштат формите на живот кои можеби не изгледаат баш како она што секојдневно го сретнуваме околу нас - додала коавторката Лиза Калтенегер, вонреден професор по астрономија на Колеџот за уметности и науки.
Астрономите досега потврдиле повеќе од 5.500 егзопланети, вклучувајќи повеќе од 30 потенцијални планети слични на Земјата. Планираните опсерватории ќе ја истражуваат хемиската структура на овие светови во зоните каде што условите се погодни за постоење на течна вода на површината.
Користејќи го животот на Земјата како водич, мултидисциплинарниот тим на научници, вклучувајќи го и Вилијам Филпот, почесен професор на Факултетот за градежништво и инженерство на животната средина при „Корнел “и Стивен Зиндер, почесен професор по микробиологија на Колеџот за земјоделство и животни науки - ги каталогизирале боите и хемиските знаци што различниот опсег на организми и минерали би ги претставил во рефлектираната светлина на егзопланетата.
Коељо собрала и одгледувала примероци од повеќе од 20 виолетови сулфурни и виолетови несулфурни бактерии кои можат да се најдат во различни средини, од плитки води, брегови и мочуришта - до длабоки морски хидротермални отвори.
Она што колективно се нарекува виолетова бактерија, всушност има низа на бои, вклучувајќи жолта, портокалова, кафеава и црвена, поради пигментите поврзани со оние што ги прават доматите црвени, а морковите портокалови. Тие напредуваат на нискоенергетската црвена или инфрацрвена светлина, користејќи поедноставни системи за фотосинтеза кои користат форми на хлорофил, па апсорбираат инфрацрвени зраци и не создаваат кислород.
Според истражувачите, тие веројатно биле распространети во раната форма на Земјата, пред појавата на фотосинтезата од растителен тип и би можеле да бидат особено приспособени на планетите што кружат околу поладни црвени џуџести ѕвезди - најчестиот тип во нашата галаксија.
По мерењето на биопигментите и лесните отпечатоци на виолетовите бактерии, истражувачите создале модели на планети слични на Земјата, со различни услови. Во низа симулирани средини - и влажните и сувите виолетови бактерии произведувале интензивно обоени биопотписи.
Калтенегер, автор на книгата „Вонземјани: Новата наука за лов на планети во космосот“, вели дека откривањето живот е толку тешко со сегашната технологија, што ако дури и едноклеточни организми се најдат на едно место, тоа би сугерирало дека животот мора да биде широко распространет во космосот. Тоа би го револуционизирало нашето размислување за вековното прашање: Дали сме сами во универзумот?
- Ние само ги отвораме очите за овие фасцинантни светови околу нас. Виолетовите бактерии можат да преживеат и да напредуваат под толку различни услови, што е лесно да се замисли дека на многу различни светови виолетовата можеби е само новата зелена боја - заклучува Калтенегер.
Извор: Phys.org
Фото: Freepik