Додека се зголемува бројот на земји што издаваат предупредувања за патување во САД, некои туристи одлучуваат целосно да ја бојкотираат оваа земја. Што тоа би значело за американската економија?

Според специјален прилог на Би-би-си, многу странци се премислуваат за патување во САД, а причините за тоа лежат во најновите политички случувања.

Политиките на американскиот претседател Доналд Трамп, воведувањето царини за сојузниците и строгите имиграциски мерки придонесуваат многумина да ги преиспитаат своите планови за патување во САД.

Заострените гранични мерки доведоа до апсење на неколку канадски и европски туристи, што поттикна земји како Германија, Обединетото Кралство, Данска, Финска и Португалија да издадат предупредувања за своите граѓани при патување во САД.

Истовремено расте бројот на оние што повикуваат на целосен бојкот на патувањата во Америка. Особено е забележлив оладениот однос од Канада, од каде што годишно во САД пристигнуваа над 20 милиони туристи, што е повеќе од која било друга земја.

Политички тензии и намалување на туристичкиот интерес

Како одговор на царинските мерки и заканите за анексија од страна на САД, поранешниот канадски премиер Џастин Трудо неодамна им порача на своите сограѓани дека е време да се избере Канада. Тој ги охрабри Канаѓаните да размислат за промена на своите летни планови и да останат во земјата.

Повикот очигледно наиде на одѕив бидејќи многумина ги откажуваат своите патувања во САД. Според податоците на Канадската статистичка служба, во февруари бројот на преминувања на границата се намалил за повеќе од 20 отсто.

Американската туристичка асоцијација проценува дека дури и 10 отсто помал број канадски посетители би можел да резултира со загуба од 2,1 милијарди долари во потрошувачка и 14.000 работни места.

Страв поради небезбедност

Покрај политичките причини, некои Канаѓани велат дека веќе не се чувствуваат безбедно како порано кога патуваа во Америка со оглед на заострувањето на односите со Канада.

Канадскиот писател и комичар Кит Сери ги откажа своите пет настапи во Њујорк поради политичката ситуација.

- Искрено, не се чувствувам безбедно во САД во моментов. Освен тоа, имам силна отпорност кон трошење на моите пари за да ја поддржам економијата на земја која ја сметам за непријателска - напиша тој на неговиот фејсбук-профил.

Последните месеци некои канадски граѓани се соочуваат со најстроги гранични контроли досега, дури и ако имаат валидна документација.

Парадоксот на туристичкиот бум

Интересно е што ова се случува во време кога САД бележи рекорден раст во туристичкиот сектор. Според извештајот на Светскиот совет за патувања и туризам (WTTC) од 2024 година, Америка останува водечка туристичка дестинација во светот. Според податоците на Американскиот завод за статистика, се очекува да бидат отворени повеќе од 800.000 нови работни места во секторот за туризам и угостителство.

- Овие бројки ја покажуваат важноста на овој сектор во САД. Секоја загуба на туристи од најголемите пазари, како Канада, може сериозно да ја погоди американската економија - вели Марта Солико, професорка на Универзитетот во Лас Вегас и директорка на Центарот за туристички истражувања.

- Комбинацијата на забрани и намален интерес за патувања во САД може да има значителен удар врз туристичкиот и економскиот развој - вели Џеф Ли, поранешен државен секретар на Калифорнија.

Само во Калифорнија меѓународните туристи донеле над 24 милијарди долари во локалната економија во 2023 година. Губењето на овие приходи не само што ќе влијае врз економијата, туку ќе го погоди и секојдневниот живот на обичните граѓани и локалните бизниси.

Извор: 6yka.com
Фото: Freepik