Универзитетот „Св. Климент Охридски“ – Битола започна со нова медиумска кампања под мотото
„Корени и крилја – Европска диплома дома!“, која има цел да им прикаже на студентите дека можат да добијат квалитетно образование и да бидат рамноправни учесници во европската академска заедница без да ги напуштат своите корени.
Во рамките на оваа кампања, УКЛО го одржа првиот од низата настани: „Студентската извонредност - сјајот на УКЛО“, посветен на доделување награди за студентска извонредност и сестраност. На манифестацијата, која се одржа со цел да ги награди најдобрите студенти, им беа доделени признанија на 43 студенти од прв циклус студии, кои се истакнале со својот труд и успех во академските, воннаставни и креативни активности.
Меѓу наградените студенти се оние со најдобар просек во студирањето, најдобри трудови на студентската годишна научна конференција, како и извонредни студенти кои се истакнале со својот труд и ангажман.
Ректорот на УКЛО, проф. д-р Игор Неделковски, ја истакна важноста на овие признанија, нагласувајќи дека тие претставуваат дополнителна потврда за значењето на високото образование и посветеноста на студентите кон својата академска и професионална иднина.
- Сметаме дека на овој начин ги мотивираме постојните студенти да бидат уште подобри во исполнувањето на своите наставни обврски, но и да бидат активни во УКЛО и во заедницата со наставните активности. И посебно да им укажеме на средношколците, на матурантите, дека студирањето на УКЛО е предизвик, дека можат да добијат квалитетна настава, европска настава во рамките на Колорс Алијансата. Со низа вакви поттици за нивниот успех во студирањето правиме и напори да се придружиме кон сите активности што ги прави целата држава - поголем број од нашите млади луѓе ги задржиме дома, тука. Впрочем, и нашата кампања оваа година е под мотото „Корени и крилја - Европска диплома дома!“ со цел да им укажеме дека без да ги напуштат своите корени, нашите студенти можат да добијат крилја и да бидат рамноправни учесници во Европската академска заедница и ова е само еден од тие настани.
Во Алијансата КОЛОРС посветени сме да ја славиме извонредноста - потенцира и академската раководителка на УКЛО КОЛОРС, проф. д-р Рената Петревска Нечкоска - сакаме да потенцираме дека извонредноста и сестраноста се карактеристики што се градат низ целото студирање, не само со учење на академските субјекти, предмети, квалификација и знаења, туку со многу поголеми и најразлични ангажмани во текот на студирањето. Тие, во согласност со правилниците што ги трасираме за студентите на УКЛО, веќе се вреднувани, како со ЕКТС кредити така и со најразлични дипломи, сертификати, и со нивно платено учество во организациските работи на Европската универзитетска Алијанса Колорс. Нашите студенти градат компетенција и го збогатуваат своето сиви. И тоа планираме да го продолжиме. Универзитетот преку кампањата „Корени и крилја – Европска диплома дома“ и со сите други активности продолжува да ја зајакнува својата позиција како водечки образовен центар кој не само што обезбедува квалитетно образование, туку и активно учествува во создавањето на идните лидери на академската и професионалната сцена во Македонија и пошироко во Европа.
Кампањата „Корени и крилја – Европска диплома дома!“ е првенствено насочена и кон средношколците со цел да им укаже на шансите што ги нуди УКЛО и како тие можат да продолжат со своето образование без да ја напуштат земјата трајно, а истовремено да добијат образование на европско ниво во рамки на КОЛОРС Алијансата.
(Комерцијална објава)