Во светот на архитектурата ретко се среќаваме со поединци кои не само што ги обликуваат зградите, туку и влијаат врз начинот на кој размислуваме за просторот, одржливоста и иднината на градовите. Бјарке Ингелс, дански архитект и основач на студиото БИГ (Бјарке Инглес груп), е токму тоа – непредвидлив, смел и постојано бара решенија кои комбинираат естетика, функционалност и одржливост. Неговите проекти се препознатливи по нивната комбинација на футуристички дизајн, еколошка свест и иновативен пристап, кој ги предизвикува конвенционалните правила на архитектурата.
Бјарке Ингелс дипломирал на Кралската академија за ликовни уметности во Копенхаген, каде што веќе покажал склоност кон експериментирање со форми и концепти. По неговото искуство во студиото ОМА, предводено од познатиот архитект Рем Кулхас, Ингелс основал сопствено архитектонско студио, БИГ, во 2005 година. Неговата филозофија се заснова на концептот на „хедонска одржливост“, кој тврди дека еколошки одговорната архитектура не мора да биде досадна или рестриктивна, туку напротив, може да биде забавна и иновативна.
Најпознатите проекти што ја редефинираат архитектурата
Еден од неговите први проекти што го привлече вниманието беше зградата „ВМ Хаусес“ во Копенхаген, која понуди нова интерпретација на просторот за живеење со иновативни распореди и пространи балкони. Но, вистинската пресвртница во неговата кариера беше „8 Хаус“, револуционерен станбен комплекс обликуван како број осум, кој ги комбинира приватните и јавните простори во динамична целина. Овој проект покажа како современиот урбанизам може да се обликува на начин што ја поттикнува интеракцијата меѓу луѓето.
Едно од неговите најпознати дела, „Копен хил“ во Копенхаген, е уште еден доказ за способноста на Ингелс да ја комбинира одржливоста со функционалноста. Оваа постројка од отпад до енергија не само што произведува енергија за илјадници домаќинства, туку нуди и скијачка патека, ѕид за качување и рекреативни области на својот покрив. Овој пристап кон архитектурата ја одразува неговата визија во која зградите не служат само за една цел, туку стануваат мултифункционални простори кои го збогатуваат урбаниот живот.
Во Њујорк тој го дизајнирал „ВИА 57 Вест“, станбен облакодер во форма на триаголник, кој го комбинира концептот на европскиот двор со американски облакодери. Неговата работа на „2 Светски трговски центар“, исто така, покажува колку е способен да одговори на барањата на модерните метрополи, приспособувајќи ја архитектурата на нивниот специфичен карактер.
„Д Твист“, музеј кој се наоѓа во норвешката шума Кистефос, е уште едно ремек-дело кое сведочи за неговата иновација. Оваа зграда се криви како скулптура, обезбедувајќи уникатно искуство за посетителите, а истовремено ги спојува уметноста, архитектурата и природниот пејзаж. Во главниот град на Еквадор, Кито, зградата „Икон“ стана нов симбол на урбаниот развој, со фасада покриена со зеленило што придонесува за одржливост на животната средина и ја внесува природата во срцето на градот.
Меѓу другите негови значајни дела се куќата „ЛЕГО“ во Билунд, зграда која ги симболизира играта и креативноста; „Ванкувер хаус“, импозантен облакодер со специфична геометрија, „Д Спајрл“ во Њујорк, деловна кула со континуирани зелени тераси и кампусот на „Гугл“ во Силициумската долина, кој комбинира иновативен дизајн со еколошки принципи. Дополнително, неговата канцеларија ги здружи силите со јапонскиот бренд „Нот а хотел“ за да дизајнира три вили на јапонскиот остров Сагишима. Вилите, наречени „Нот а хотел Сетучи“, ги комбинираат јапонските и скандинавските дизајнерски влијанија, инспирирани од заедничкиот акцент на минимализмот и природните материјали.
Ингелс постојано истражува нови можности во архитектурата, од пловечки градови кои се поотпорни на климатските промени до модуларни згради кои можат да се приспособат на потребите на жителите.
Неговото студио БИГ продолжува да ги поместува границите на архитектонскиот дизајн, од иновативни урбани решенија до футуристички визии како „Марс сајенс сити“ во Дубаи, замислен како експериментален град кој симулира живот на Марс. Овие амбициозни проекти докажуваат дека Ингелс е многу повеќе од обичен архитект – тој е визионер чии идеи го менуваат начинот на кој размислуваме и го доживуваме просторот.
Извор: buro247.hr
Фото: Wikipedia