МОН: Обезбедени се средства за исплата на регрес за годишен одмор на вработените во училиштата, општините да постапат согласно дадените насоки

Регресот за годишен одмор за 2023 година треба да им биде исплатен на сите вработени во основните и средните училишта. Средствата за оваа намена се обезбедени од страна на државата, преку блок-дотациите кои на месечна основа им се исплаќаат на општините, соопштија од Министерството за образование и наука.

-МОН апелира до сите локални самоуправи да ги почитуваат правните прописи и да ја реализираат исплатата на регресот за годишен одмор за 2023 година, согласно член 21 од Општиот колективен договор за јавниот сектор (Сл. весник бр.154 од 20.07.2023 година), во кој е утврдено дека работникот има право на надоместок за регрес за годишен одмор во еднократен износ кај еден работодавач, во текот на годината, без оглед во колку училишта има засновано работен однос - се вели во соопштението.

Од МОН додаваат дека допис со конкретни насоки за постапување по однос на ова прашање веќе е доставен до сите општини и секое непостапување, сноси соочување со правни последици.