Зошто жените се иднината на иновациите?

Жените одиграа клучна улога во обликувањето на технолошката индустрија. Од пионерската работа на Ада Лавлејс на првата компјутерска програма до развојот на КОБОЛ/COBOL (Заеднички бизнис-ориентиран јазик/ Common Business-Oriented Language) и концептот за „дебагирање“ од Грејс Хопер.

Пионерките како Кетрин Џонсон, Дороти Вон и Мери Џексон го овозможија вселенското истражување. Хеди Ламар учествуваше во пронаоѓањето на технологијата која ги постави темелите за безжичен интернет, блутут и ГПС.

Радија Перлман, честопати нарекувана „мајка на интернетот“, го создаде алгоритамот што ја напојува модерната мрежа.

Овие жени не само што придонесоа за технологијата, туку и ја обликуваа. Нивното наследство нè потсетува на огромниот потенцијал што се појавува кога жените ги водат иновациите.

Жените продолжуваат да ја обликуваат технологијата

Лидерките како Феи-Феи Ли, позната како „кума на вештачката интелигенција“, која е меѓу директорите на Институтот за вештачка интелигенција на „Стенфорд“, им овозможуваат на системите за вештачка интелигенција да бидат етички, инклузивни и праведни.

Д-р Џој Буламвини, основачка на „Алгоритмик Џастис Лиг“, открива клучни недостатоци во софтверот за препознавање лица, кој несразмерно погрешно ги идентификува жените и луѓето со боја.

Д-р Лиза Су, извршен директор на „Адвансд микро девајсес“ (АМД), ја трансформира компанијата за полуспроводници во глобален лидер во компјутери и игри со високи перформанси.

Гвин Шотвел, претседателка и оперативена директорка на „Спејс екс“ води комерцијално истражување за вселената и иновации како „Старлинк“, кој обезбедува пристап до интернет во оддалечените региони.

Сепак…

И покрај сето ова, жените сè уште опфаќаат само 25 отсто од технолошката работна сила. Нивното учество на лидерски позиции е уште помало – само 11 отсто. Инженерските тимови се уште помалку разновидни, а жените имаат само 14 проценти од инженерските позиции. Отсуството на различни перспективи во иновациите доведе до значителни неуспеси.

До неодамна воздушните перничиња и безбедносните појаси беа тестирани исклучиво на кукли наменети за просечно машко тело. Како резултат на тоа, жените имаат 73 отсто поголеми шанси да претрпат сериозни повреди во сообраќајни несреќи. Исто така, моделите за кардиопулмонална реанимација (CPR) традиционално се дизајнирани без да се земе предвид женската анатомија. Неодамнешните студии покажаа дека тоа придонесува за неправилности во примената на процедурите за реанимација кај жените во итни случаи.

Важноста на застапеноста

Застапеноста е важна во секој аспект на технологијата, не само во програмирањето, туку и во одборите каде што се носат одлуките за финансирање. Во лаборатории каде што се развиваат алгоритми. Во училниците каде што се обучуваат идните иноватори.

Затоа иницијативите како „Алгоритамот за еднаквост“ се фокусираат на прикажување и профилирање на жените во технологијата. Со истакнување на нивните приказни се создава план за системски промени, осигурувајќи дека придонесите на жените се видливи и прославени.

Истражувањата покажуваат дека мешаните тимови постигнуваат подобри резултати

Една студија покажала дека мешани тимови носат подобри одлуки во 87 проценти од времето. Истражувањето на „Мекинси“ покажува дека компаниите што се наоѓаат во највисокиот квартал по родова разновидност во извршните тимови имаат 21 отсто поголема веројатност да бидат профитабилни.

Постигнувањето рамнотежа на половите до 2025 година би можело да отклучи 28 трилиони долари во глобалниот раст на БДП.

Технолошката индустрија е на крстопат. Може да продолжи да функционира како што функционира, оставајќи половина од населението недоволно застапено. Или може да ја искористи можноста и да го реализира целосниот потенцијал на жените.

Жените веќе го предводат патот во областа на вештачката интелигенција, еколошките технологии и квантните компјутери. Тие го обликуваат образованието, поттикнуваат етички иновации и го трансформираат пејзажот на лидерство во технологијата. Кога инвестирате во жени, вие не инвестирате само во напредок - вие правите вистинско влијание.

Извор: forbes.n1info.hr

Фото: Freepik