ФБИ предупредува: овие веб-страници можат да ви ги украдат податоците

Во последно време американското Федерално биро за истраги (ФБИ) сè почесто издава предупредувања поврзани со сајбер-безбедноста. Последното од нив, иако првенствено наменето за корисниците во САД, им привлече внимание на интернет-корисниците низ светот.

Според најновото предупредување објавено на официјалната страница на ФБИ, корисниците треба да престанат да користат веб-страници што нудат бесплатна конверзија на документи од еден формат во друг.

Како функционира измамата?

Агентите на ФБИ забележале зголемен број пријави за измами поврзани со овие алатки. Овие веб-страници често содржат малициозен софтвер што ги краде личните податоци на жртвите, а во најлош случај, инсталира и софтвер што ги блокира фајловите на уредот и бара откуп.

- Сајбер-криминалците во светот користат различни бесплатни алатки за конверзија на документи. Тие создаваат веб-страници што нудат, на пример, спојување на повеќе ЈПГ-датотеки во еден ПДФ или преземање на МП3 и МП4 фајлови - предупредува ФБИ.

Но, наместо конвертирање, корисниците всушност преземаат вируси. Дополнително, можни се и кражби на податоци директно од документите: имиња, информации за криптовалути, лозинки, е-пошта и други чувствителни информации.

Криминалците често регистрираат веб-адреси што изгледаат легитимно, но имаат само една изменета буква, со што корисниците лесно можат да бидат измамени. Посебно ранливи се оние што пристапуваат до овие веб-страници преку пребарувачи бидејќи алгоритмите сега прикажуваат платени резултати што можат да бидат лажни.

Како да се заштитите?

ФБИ препорачува неколку чекори за заштита од оваа закана:

- Бидете внимателни и размислете пред да кликнете. Размислете за ризиците пред да користите онлајн алатки.

- Редовно ажурирајте го антивирусниот софтвер и скенирајте ги сите датотеки што ги преземате пред да ги отворите.

Ако веќе сте станале жртва на ваква измама, веднаш преземете мерки:

- Контактирајте ги вашите финансиски институции и заштитете ги вашите профили.
- Променете ги сите лозинки преку сигурен уред.
- Пријавете го случајот во полиција.
- Извршете целосно скенирање на уредот и, доколку е потребно, побарајте стручна помош за чистење од малициозен софтвер.

Извор: n1info.hr
Фото: Freepik