Рабеа Рог е првата Германка што отпатува во вселената

Рабеа Рог, 29-годишна роботичарка од Берлин, е првата Германка што отпатува во вселената со ракета на „Спејс екс“.

Инженерката по електротехника е дел од четворицата „меѓународни авантуристи“ лансирани од станицата „Кејп Канаверал спејс форс“ во Флорида. Според германскиот вселенски центар, Рог е 13. личност со германско државјанство што отишла во вселената, но првата жена меѓу нив.

Во текот на петдневната мисија во капсулата „Драгон“ на „Спејс екс“ тимот ќе ги набљудува поларните региони на Земјата за да го испита феноменот познат како „Стив“, кој вклучува виолетови ленти на небото, слични на поларната светлина.

Рог студирала електротехника и информатичка технологија на „ETХ Цирих“ пред да се префрли на Норвешкиот универзитет за наука и технологија, каде што го завршува својот докторат. Таа била поканета на летот од Малтежанец со кинеско потекло, Чун Ванг, милијардер на криптовалути кој ја нарачал и финансирал мисијата. Ванг и Рог, наводно, се сретнале додека тренирале за експедиција во северниот норвешки архипелаг Свалбард.

Со нив во вселената се и норвешки режисер и австралиски поларен истражувач, но ниту еден од членовите на екипажот не е обучен астронаут и нема пилотска дозвола.

Извор: tportal.hr

Фото:YouTube screenshot