Стивен Кинг го напушти „Фејсбук“ и ги предупреди другите корисници

Стивен Кинг го избриша својот фејсбук-профил и изрази загриженост поради ширењето лажни и непроверени информации и нарушувања на приватноста на оваа социјална мрежа.

- Го напуштам „Фејсбук“ - напиша Кинг во петокот на својот твитер-профил.

- Не ми е пријатно поради поплавата на лажни информации во текот на политичкото огласување на оваа социјална мрежа и не сум уверен дека е добро заштитена мојата приватност. Ако сакате, можете да продолжите да ме следите на „Твитер“ - напиша тој.

По изјавата неговиот фејсбук-профил беше избришан.

Кинг, кој има напишано повеќе од 50 книги, најпознат е по своите дела од жанрот хорор и фантазија, од кои голем дел се адаптирани во филмови и телевизиски серии. Но, 72-годишниот писател е и политички активен и отворено зборува за неговите ставови во врска со американскиот претседател Доналд Трамп.

„Фејсбук“ им овозможува на корисниците да објавуваат огласи и да таргетираат специфични групи корисници. Некои сметаат дека таквите огласи од политички вид може да го поткопаат јавниот дискурс.

Од друга страна, „Твитер“ во октомври објави дека ќе престане да објавува политички реклами.