Западната исхрана убива повеќе луѓе отколку пушењето

Стереотипната западна исхрана со висока содржина на сол, маснотии и недостиг на овошје и влакна е одговорна за повеќе смртни случаи во светот отколку пушењето и високиот крвен притисок, покажува едно истражување.

Околу една петтина од сите смртни случаи во светот се припишуваат на нездравата исхрана, што е главен предизвикувач на срцеви заболувања, рак и дијабетес.

Анализата во која се споредуваат исхраната, смртните случаи и стапките на болести во 195 земји покажа дека лошите навики во исхраната се сè поприсутни поради промената на навиките што доведуваат до почесто консумирање месо, а помалку зеленчук, заедно со консумирањето брза храна.

Анализата покажа дека намалената доза на цели зрна и овошје и високата потрошувачка на натриум, што се наоѓа во солта, се одговорни за половина од смртните случаи поврзани со исхраната. Остатокот се припишува на високата потрошувачка на црвено и преработено месо, пијалаци засладени со шеќер и друга нездрава храна, вклучувајќи ја и храната што содржи трансмасни киселини.

Најголемиот дел од смртните случаи поврзани со исхраната биле поради срцеви заболувања, проследени со рак и дијабетес тип 2.

- Лошата исхрана е убиец на можности. Ние сме она што го јадеме и ризиците влијаат врз луѓето низ низа демографски податоци, вклучувајќи ги возраста, полот и економскиот статус - изјави водечкиот експерт д-р Ашкан Афшин од Универзитетот во Вашингтон.

Наместо да го истакнат проблемот со висока стапка на јадење брза храна, авторите го истакнаа проблемот со ниска потрошувачка на здрава храна.

- Политиките на исхрана што се фокусираат на промовирање здрава исхрана може да имаат повеќе корисен ефект од политиките што се залагаат против нездравата храна - додаде д-р Афшин.

Исхраната што е најтесно поврзана со смртните случаи е онаа со висока содржина на натриум и цели зрна, овошје, јаткасти плодови и омега-3 масни киселини, покажа истражувањето. Секој од овие фактори опфаќа повеќе од 2 отсто од сите смртни случаи на глобално ниво.

Професорот од Универзитетот „Харвард“ вели дека наодите ги поддржуваат неодамнешните истражувања за срцеви и артериски болести што се залагаат за замена на месото со растителни протеини.

Драстичното намалување на потрошувачката на месо неодамна беше нагласено од друга група, која рече дека јадењето хамбургери, колбаси и друго црвено месо треба да падне во западните земји за 80 отсто за да се заштитат планетата и здравјето.

- Воведувањето исхрана што ја става во акцент храната со соја, грав и други здрави извори на протеини, ќе има важни придобивки за здравјето на луѓето и планетите.

Д-р Ана Дијаз Фонт од Светскиот фонд за истражувања на ракот изјави дека истражувањето е многу важно со оглед на тоа што ја демонстрира главната улога на исхраната врз здравјето на поединците и населението.

- Нашите истражувања покажуваат дека лошата исхрана го зголемува ризикот од рак и дебелина и со тоа го зголемува ризикот од 12 различни видови рак. Ги повикуваме владите да ги спроведат политиките и врз основа на доказ што ќе ги поттикнат луѓето да направат поздрав избор - рече таа.