Јужна Кореја ја забрани продажбата на кучешко месо
Јужна Кореја донесе нов закон со кој треба да се укине индустријата за колење кучиња и продажба на нивното месо до 2027 година. Јадењето кучешко месо е практика стара со векови на Корејскиот Полуостров, но како што минуваат годините, сѐ повеќе жители и активисти се залагаат за забрана.
Според новиот закон, ќе биде забрането одгледување или колење кучиња за консумирање, како и дистрибуција или продажба на кучешко месо. Оние што ќе го прекршат законот може да завршат в затвор. Имено, законот предвидува оние што колат кучиња да добијат казна затвор до три години, а оние што одгледуваат кучиња за месо или продаваат кучешко месо да одлежат најмногу две години.
Сепак, самото консумирање кучешко месо нема да биде нелегално. Новиот закон влегува во сила за три години, за да им даде време на земјоделците и на сопствениците на ресторани да најдат алтернативно вработување и приходи, пишува Би-би-си.
Владата вети дека ќе ги поддржи одгледувачите на кучешко месо, месарниците и сопствениците на ресторани кои нудат кучешко месо, кои ќе ги затворат своите бизниси поради новиот закон. Засега не се разработени детали за висината и начините на компензација.
Според официјалните владини податоци, Јужна Кореја имала околу 1.600 ресторани за кучешко месо и 1.150 фарми за кучиња во 2023 година.
Според анкетата на Галуп од минатата година, само 8 проценти од луѓето рекле дека пробале кучешко месо во изминатите 12 месеци, што е намалување од 27 отсто во 2015 година. Помалку од една петтина од анкетираните изјавиле дека ја поддржуваат потрошувачката на месо.
Извор: МИА