Светска банка: Најголем глобален пад во економијата од Втората светска војна

Пандемијата на коронавирусот и мерките преземени од страна на државите со цел да го сузбијат до крајот од 2020 година ќе доведат до најголем пад на светската економија од Втората светска војна, нагласува Светската банка во најновиот извештај.

Според прогнозите на Светската банка, глобалниот раст ќе падне за 5,2 проценти оваа година, што би било најдлабока рецесија по Втората светска војна.

Повеќето светски економии би доживеале најголем пад на производството по глава на жител од 1870 година, соопшти Светската банка во извештајот „Глобални економски перспективи“.

Најтешко погодени се оние држави каде што пандемијата е најлоша и кои во голема мера се потпираат на глобалната економија, туризмот, извозот на стоки и надворешното финансирање.

Силата на ударот ќе варира од регион до регион, но сите нови пазари и економиите во развој имаат зголемена ранливост, предупредува Светска банка. Во Европа се очекува економски пад од 7 отсто, додека во САД од 6,1 отсто пред да се појават знаци на закрепнување во 2021 година. Во 90 отсто од 183 економии се очекува пад на БДП во 2020 година.

Поради сериозно нарушување на домашната понуда и побарувачка, економијата и финансиите, економската активност на напредните економии се очекува да се намали за 7 проценти во 2020 година.

Кај новите пазари и економиите во развој се очекува пад од 2,5 проценти оваа година, што е најголемо во изминатите 60 години.