Пронајдени докази за „суперчовечки“ имунитет на ковид-19 кај некои лица

Некои научници го нарекоа „суперчовечки имунитет“ или „отпорен на куршуми“. Но, имунологот Шејн Кроти претпочита „хибриден имунитет“.

- Хибридниот имунитет кон САРС-КоВ-2 се чини дека е импресивно моќен - напиша Кроти во коментар за списанието „Сајнс“ во јуни.

Без разлика како го нарекувате, овој тип имунитет ги нуди потребните добри вести во она што изгледа како бесконечна низа лоши вести во врска со ковид-19.

Во текот на изминатите неколку месеци серија студии покажаа дека некои луѓе поставуваат исклучително моќен имунолошки одговор против САРС-КоВ-2, коронавирусот што ја предизвикува болеста ковид-19. Нивните тела произведуваат многу високо ниво на антитела, но тие исто така прават антитела со голема флексибилност - најверојатно способни за борба против варијантите на коронавирус што циркулираат во светот, но исто така најверојатно ефикасни против варијантите што може да се појават во иднина.

- Разумно може да се предвиди дека овие луѓе ќе бидат добро заштитени од повеќето, а можеби и од сите варијанти на САРС-КоВ-2 што најверојатно ќе ги видиме во догледна иднина - вели Пол Биенијас, виролог на Универзитетот „Рокфелер“, кој помогнал во водењето неколку студии.

Во студија објавена на интернет минатиот месец, Биенијас и неговите колеги пронашле антитела кај овие лица кои можат силно да ги неутрализираат тестираните шест варијанти, вклучително и делта и бета, како и неколку други вируси поврзани со САРС-КоВ-2, вклучително и еден во лилјаци, два во панголини и оној што ја предизвика првата пандемија на коронавирус, САРС-КоВ-1.

- Ова е малку повеќе шпекулативно, но исто така можно е овие луѓе да имаат одреден степен на заштита од вирусите слични на САРС - вели Биенијас.

Кој е способен да го засили овој „суперчовечки“ или „хибриден“ имунолошки одговор?


- Тие луѓе имаат неверојатен одговор на вакцината - вели вирусологот Теодора Хаџиоану од Универзитетот „Рокфелер“, која исто така помогна да се водат неколку студии.

- Мислам дека тие се во најдобра позиција за борба против вирусот. Антителата во крвта на овие луѓе можат дури и да го неутрализираат САРС-КоВ-1, првиот коронавирус, кој се појави пред 20 години. Тој вирус е многу, многу различен од САРС-КоВ-2 - вели таа.

Всушност, овие антитела можеа дури и да деактивираат вирус дизајниран, намерно, да биде многу отпорен на неутрализација. Овој вирус содржеше 20 мутации за кои е познато дека спречуваат антителата на САРС-КоВ-2 да се врзат за него. Антителата од луѓе што беа само вакцинирани или само имаа претходни инфекции со коронавирус, во суштина беа бескорисни против овој мутантен вирус. Но, антителата кај луѓето со „хибриден имунитет“ би можеле да го неутрализираат.

- Овие наоди покажуваат колку се моќни РНК-вакцините кај луѓе со претходна изложеност на САРС-КоВ-2. Сега има многу истражувања фокусирани на пронаоѓање на панкоронавирус-вакцина која ќе заштити од сите идни варијанти. Нашите наоди кажуваат дека веќе ја имаме - вели Теодора.

- Но, постои услов. Прво, треба да бидете заразени со ковид-19. По природната инфекција, се чини дека антителата се развиваат и стануваат не само посилни, туку и пошироки. Тие стануваат поотпорни на мутации во рамките на вирусот - додава таа.

Теодора и нејзините колеги не знаат дали секој што имал ковид-19, а потоа и РНК-вакцина ќе има таков извонреден имунолошки одговор.

- Ги проучувавме феномените само со неколку пациенти, бидејќи е исклучително макотрпно и тешко истражување - вели таа. Но, се сомнева дека е доста често.

- Со секој од пациентите што ги проучувавме го видовме истото. Студијата објавува податоци за 14 пациенти - вели таа.
Неколку други студии ја поддржуваат нејзината хипотеза - и ја поддржуваат идејата дека изложеноста и на коронавирус и на РНК-вакцина предизвикува исклучително моќен имунолошки одговор. Во една студија објавена минатиот месец во „Њу ингланд џурнал оф медисин“, научниците анализирале антитела генерирани од луѓе што биле заразени со оригиналниот вирус, САРС-КоВ-1 во 2002 или 2003 година и кои примиле РНК-вакцина оваа година.

Овие луѓе, исто така, произвеле високо ниво на антитела и антитела кои би можеле да неутрализираат цел спектар на варијанти и вируси слични на САРС.

Сега, се разбира, има толку многу преостанати прашања. На пример, што ако се заразите со ковид-19 откако ќе се вакцинирате? Или може ли лице кое не е заразено со коронавирус да даде „суперчовечки“ одговор ако прими трета доза вакцина како засилувач?

Теодора вели дека не може да одговори на ниту едно од овие прашања.

- Сигурна сум дека третата доза ќе им помогне на антителата на една личност да се развијат уште повеќе и можеби ќе добијат одредена широчина или флексибилност, но дали ќе успеат да ја добијат широчината што ја гледаме во природната инфекција, тоа не е јасно - вели таа.

Имунологот Џон Вери од Универзитетот во Пенсилванија има малку поголема надеж.

- Во нашето истражување веќе гледаме дека дел од оваа еволуција на антитела се случува кај луѓе кои се само вакцинирани иако тоа веројатно се случува побрзо кај луѓето што биле заразени - вели тој.

Во една неодамнешна студија, објавена на интернет кон крајот на август, Вери и неговите колеги покажале дека со текот на времето, луѓето што имале само две дози од вакцината (и без претходна инфекција) почнуваат да создаваат пофлексибилни антитела - антитела кои можат подобро да препознаат многу од варијантите на загриженост.

Така, третата доза на вакцината веројатно ќе им даде поттик на тие антитела и ќе ја поттикне еволуцијата на антителата понатаму, вели Вери. Така, едно лице ќе биде подобро опремено да се бори против која било варијанта што вирусот ќе ја објави следно.