„Сакам да одам, ама не е ниту паметно ниту безбедно“, „Кој се плаши, нека си седи дома“... Дискотеките отворени, еве што мислат младите
Полека се враќа во живот ноќниот живот. Бројот на оние што стравуваат од дискотеките, сепак, е поголем од бројот на оние што се забавуваат. Во мини-анкета направена од „Факултети.мк“ на прашањето „Дали би отишле во дискотека и покрај пандемијата. Дали сметате дека е безбедно?“, поголем процент од дадените одговори се дека не би отишле во дискотека и сѐ уште не се чувствуваат безбедни
Пандемијата силно се одрази во секој сегмент, па така и во ноќниот живот на младите. Коронавирусот целосно го смени животот на младите. Иако дискотеките и ноќните клубови почнаа со работа со капацитет од 50 отсто, стравот сè уште е присутен и младите не се чувствуваат безбедни при посета на забави. А и сопствениците на дискотеките и на ноќните клубови велат дека не работат со полн капацитет од дозволеното.
Во мини-анкета направена од нашиот медиум „Факултети.мк“ на прашањето „Дали би отишле во дискотека и покрај пандемијата. Дали сметате дека е безбедно?“, поголем процент од испитаниците или од дадените одговори се дека не би отишле во дискотека и сѐ уште не се чувствуваат безбедни.
Како размислуваат младите?
„Никако одење во дискотека во време на пандемија“, „Никој не е безбеден“, „Сакам да одам, ама не е ниту паметно ниту безбедно“, „Би одела само на отворено, во затворени дискотеки и ноќни клубови не ми е сигурно“, „Секако дека не е безбедно, вакцината не игра улога во пренесувањето на вирусот. Веќе неколку пати се докажа тоа“. „Не би отишол. Сметам дека не е безбедно.“
Ова се само дел од одговорите на нашите учесници во мини-анкетата кои, сепак, и покрај тоа што минатата недела се отворија дискотеките и ноќните клубови, претпочитаат да останат дома, на безбедно.
Но не мислат сите исто. Има многу лица кои едвај чекаа да се отворат дискотеките и да му се вратат на ноќниот живот. Велат дека полека се враќа во живот ноќниот живот.
- „Со две примени дози од која било вакцина треба да пуштаат на врата во диско и масите да бидат наместени по протокол. Во цела Македонија има активен ноќен живот, само во Велес е тапа“, е еден од одговорите на анкетираните.
„Јас бев во саботата, платив влез и добив гратис пијачка.“ „Излегов неколку пати, безбедно е.“ „Треба да се врати ноќниот живот. Кој се плаши, нека си седи дома на топло.“ „Безбедно е за нас, вакцинираните.“ „Штом можат да се држат митинзи, може да се оди и во дискотека“. „За мене е безбедно. Ја прележав. И за вакцинираните било безбедно, така слушам“ - се дел од одговорите.
Едвај 30 отсто од капацитетот е исполнет
Потврда дека пандемијата сѐ уште има големо влијание врз ноќниот живот се и полупразните дискотеки и ноќни клубови. Секако, има исклучоци, проциркулираа дури и информации дека не секаде се почитуваат рестриктивните мерки и дадениот протокол. Па така викендов некои скопски популарни дискотеки биле преполни, буквално луѓето се туткале, кажуваат младите посетители, додека дел од угостителите се жалат и велат протоколите драстично им ја намалиле работата.
- Ништо не е исто, иако почнавме со работа. За жал, короната сѐ уште има големо влијание врз сè, таа е присутна и кога не работевме и сега кога ги ослободија мерките и почнавме со работа. Ќе треба многу време за да се вратиме на старо и да ја вратиме довербата на младите. Сега иако е дозволено да се работи со капацитет од 50 отсто, едвај 30 отсто се полни објектот. Но многу лоша реклама ни направија, нè претставуваат како криминалци. И жално е што ова се случува само во Македонија. Тотално некоректен однос добивме од државата. За да одиме кон подобро, потребна беше вакцинација. Се вакциниравме за да бидеме слободни, да работиме и да го вратиме животот во нормала. И сега се чувствуваме искористени. Доволно беа 19 месеци без работа - ни изјавија од ноќниот клуб „Аватар“.
Од 15 ноември со две приемни вакцини во диско
Комисијата за заразни болести дозволи работа на барови и ноќни клубови - дискотеки, како и на угостителските објекти кои се регистрирани за прослави во затворениот дел на објектите до 50% исполнетост од капацитетот на просторот.
- Мерките и препораките што ги предложи Комисијата за заразни болести, а ги усвои Владата се објавени на страницата
vlada.mk. Општите препораки од Комисијата за заразни болести се истите што важат за однесување во отворен/затворен простор во угостителски објекти, со цел спречување на ширењето на ковид-19. Генералните препораки за заштита на сопственото здравје и здравјето на другите се одржување редовна лична хигиена, носење маска и навремена и целосна вакцинација - ни изјавија од одделението за односи со јавност на Министерството за здравство.
До 14 ноември за влез во кафеани и дискотеки потребно е сертификат/потврда за извршена имунизација (вакцинација) од вирусот, односно примена најмалку првата доза од вакцината против ковид-19. Од 15 ноември ќе треба да имате примено две дози вакцина или сертификат/потврда за прележан ковид-19 во последните 45 дена, сметајќи од денот на оздравувањето, според најновите протоколи од Министерството за здравство.