Што може да заклучи „Гугл“ за вас врз основа на вашите фотографии - проверете на оваа веб-страница

Вишну Мохандас е поранешен инженер на „Гугл“ кој се откажал од работата во знак на протест откако дознал дека компанијата ѝ помага на американската војска да развие алгоритми за детална анализа на снимките од беспилотни летала. Користењето на технологијата за војување со вештачка интелигенција за него била премногу, па го напуштил „Гугл“ (каде што работел на проектот „Гугл асистент“) и, како што изјавил, престанал да ги складира своите фотографии на услугата „Гугл фотос“. Тој бил исплашен од помислата дека моделите со вештачка интелигенција можат да се тренираат со моќни алгоритми на неговите фотографии.

Со цел јасно да ѝ покаже на јавноста колку е моќна технологијата за компјутерска визија денес, тој одлучил да создаде специјална услуга. Идејата ја добил пред околу половина година, а проектот бил лансиран на „theyseeyourphotos.com“. Како што посочува името на доменот, „тие ги гледаат вашите фотографии“ - тоа е основната порака која ќе му стане јасна на секој што ќе постави некоја од своите фотографии во апликацијата на Мохандас.

Со користење „гугл вижн АПИ“, фотографијата ќе се анализира до последен детал, а корисникот ќе добие опширен текстуален опис на она што се наоѓа на неа, како и сѐ што може да се заклучи врз основа на виденото. Ова ќе вклучува информации како возраст, пол, раса, социо-економски статус, стил на облекување, говор на телото и слично, за сите луѓе на фотографијата, ќе има и детали за околината, заклучоци за можниот момент на снимање и атмосфера и слично. Се разбира, ако на услугата ѝ дадете „сурова“ фотографија директно од вашиот мобилен телефон, таа ќе ги извлече од метаподатоците сите информации за уредот со кој е направена и, доколку е достапна, точната локација од метаподатоците за геолокација.

Ако сето тоа го добивате од само една фотографија, веројатно не можете ни да замислите што „Гугл“ знае за вас врз основа на целата архива на вашите фотографии што вие, без воопшто да размислувате за тоа, ги поставувате на облак-услугата. Ова е и главната порака на услугата - чиј автор сака да ги поттикне другите да се свртат кон посигурни начини за складирање на нивните податоци.

Сервисот може да се користи и за „детективски“ цели, истражување на ОСИНТ (интелигенција со отворен код за собирање и анализа на податоци) или слично. Условите за приватност наведуваат дека поставените фотографии нема да се чуваат, но очигледно е дека податоците од нив ќе бидат испратени до АПИ сервисите на „Гугл“ за да се добијат „неопходните“ информации.

Извор: bug.hr

Фото: theyseeyourphotos.com/screenshot