Камера во САД ќе слика 1.000 години за да направи една фотографија
Подготвил:
Драгана Петрушевска
Лектор:
Ивана Кузманоска
На врвот на рид во Тусон, САД, се наоѓа камера која во моментов прави фотографија. Таа ќе продолжи да ја прави фотографијата во следните 1.000 години. Ова нема да биде обична фотографија, туку фотографија која ќе ги покажува сите промени во пределот во еден милениум.
Ова е тешко да се замисли бидејќи станува збор за експериментален концепт на филозофот Џонатан Китс и група истражувачи од Универзитетот во Аризона. Китс очекува оваа камера да трае подолго од најнапредните технологии.
- 1.000 години е долго време и има многу причини зошто ова може да не функционира. Камерата можеби нема да биде тука еден милениум. Има природни сили и одлуки на луѓето, административни или криминални, кои може да доведат до уништување на камерата - вели Китс.
Како функционира камерата?
Камерата што тој ја дизајнира има мала дупка во тенок лист од 24-каратно злато за да дозволи светлината да влезе. Оваа светлина потоа поминува низ мал бакарен цилиндар поставен на челичен столб. Површината во внатрешноста на фотоапаратот е обложена со многу слоеви боја. Во текот на 1.000 години сончевата светлина што се рефлектира од пределот на Тусон постепено ќе влијае врз површината на камерата која е чувствителна на светлина.
Оваа продолжена изложеност, со векови, ќе ги доловува промените во пределот на Тусон низ годините. Добиената слика, кога камерата на крајот ќе биде отворена од луѓето во иднината, ќе биде уникатна и долгорочна евиденција за трансформациите на Тусон во различни епохи.
Китс се надева дека фотографијата ќе ги поттикне луѓето во иднината да преземат мерки за зачувување на планетата.
Извор:
Interesting engineering
Насловна фотографија:
The University of Arizona