Ако патник умре за време на летот, членовите на кабинскиот екипаж мора брзо да ја решат ситуацијата.
- Се движиме од услужување на патници до спасување животи, потоа на судска медицина, справување со мртви тела и потоа проверка на патници. Мораме да се организираме - вели 40-годишниот Џеј.
Џеј, шеф на кабински екипаж во голема европска авиокомпанија и поранешен стјуард, има повеќе од една деценија искуство со работа на авиони. Како и сите членови на кабинскиот екипаж, тој е обучен во случај на смрт на патник, но такво искуство имал само еднаш. Тој вели дека смртните случаи во авиони се „многу ретки“ и дека луѓето имаат поголема веројатност да умрат на долги летови бидејќи не се движат подолго време.
Некои членови на кабинскиот екипаж никогаш не доживеале смрт на патник во текот на нивните кариери, вели тој. Една студија објавена во „Њу Ингланд журнал за медицина“ во 2013 година заклучила дека смртта во текот на летот е ретка. Студијата, која следела итни повици од пет авиокомпании до медицински комуникациски центар од јануари 2008 до октомври 2010 година, покажала дека 0,3 отсто од пациентите што добиле итна медицинска помош за време на лет починале.
Од Би-би-си разговарале со членови на кабинскиот екипаж и други воздухопловни експерти за тоа како вообичаено се постапува со смртните случаи при летот, какви се правилата во врска со сместувањето на телата во авионите и како е да се работи на лет кога некој ќе почине.
Членовите на кабинскиот екипаж не можат да потврдат смрт, тоа мора да го направи медицинскиот персонал. Понекогаш тоа се прави за време на летот ако некој од патниците е квалификуван, но почесто се прави по слетувањето.
Повеќето авиокомпании ги следат упатствата на Меѓународната асоцијација за воздушен транспорт (ИАТА) за тоа што да прават ако се претпоставува дека патникот починал, иако политиките на авиокомпаниите малку се разликуваат.
Многу е веројатно телото на починатиот да биде ставено на празно седиште
- Во случај на итен медицински случај, кабинскиот екипаж обезбедува прва помош и бара помош од сите патници што се здравствени работници, додека капетанот го користи телекомуникацискиот систем за да добива инструкции од лекарите на терен - вели Марко Чан, поранешен комерцијален пилот и виш предавач на Универзитетот во Бакингемшир, Англија.
Доколку е потребно, капетанот веднаш го пренасочува летот. Сепак, не е секогаш можно да се спаси патник. Ако се претпоставува дека патникот е мртов, тој треба да биде со врзани очи и да се стави во торба за тело, доколку е достапна, или покриен со ќебе до вратот, се наведува во упатствата на ИАТА.
Просторот е многу ограничен и тешко е да се најде соодветно место за лежење на телото, без да се вознемируваат другите патници и да се загрози безбедноста на авионот. Според ИАТА, телото треба да се премести на седиште подалеку од другите патници или на друг дел од авионот, доколку е можно. Меѓутоа, ако авионот е полн, телото обично се враќа на неговото седиште.
Не може да се стави телото во кујната без да се блокира излезот за итни случаи. Исто така, не може да се остави на патеките за можна евакуација во случај на итност, ниту да се стави во просторот за одмор на екипажот при долги летови. Исто така, тешко е физички да го маневрирате телото во толку затворен простор, што значи дека и екипажот нема многу опции.
Во итен случај летот се пренасочува во обид да се спаси животот на патникот, но обично не се пренасочува ако патникот веќе се претпоставува дека е починат, велат воздухопловните експерти и членовите на кабинскиот екипаж. Капетанот веднаш ги известува и оперативниот центар на авиокомпанијата и контролата на летање за смртта на патникот, а авионот е пречекан од локалните власти по слетувањето. Претставниците на локалните власти или на авиокомпанијата контактираат со семејството на патникот доколку тој патувал сам.
Али Марфи, која е домаќинка на поткастот „Црвено око“ во кој разговара со стјуардеси, доживеала смрт на патник во авион за време на нејзините 14 години како член на кабината. Маж кој патувал сам од Акра, главниот град на Гана, до Лондон, се онесвестил на своето седиште. Откако патникот на седиштето до него ја известил кабинската екипа, тие сфатиле дека човекот не дише нормално и нема пулс.
Екипажот го преместил човекот за да изврши кардиопулмонална реанимација (CPR). Меѓутоа, во кујната имало повеќе простор од вообичаено бидејќи количката била извадена за послужување оброци. Али и уште еден член на кабинскиот екипаж се обидувале да го оживеат патникот 40 минути, но безуспешно.
Капетанот потоа решил да го пренасочи авионот во Лион, Франција, а Али и нејзиниот колега, иако знаеле дека треба да седнат и да ги врзат појасите за слетувањето, продолжиле да вршат реанимација цело време, како што истакнала таа. По слетувањето, патникот бил однесен со возило на брза помош.
- Тој беше прогласен за мртов, откако претрпе аневризма на абдоминалната аорта. Го држев в раце во последните моменти од неговиот живот. Веројатно би избрал некој друг за тоа, но ме доби мене - се потсетила Али.
Откако авионот повторно полетал за својата дестинација, патниците биле прилично тивки и мрачни, според сеќавањето на Али. Смртта на патник за време на лет била трауматично искуство за Али.
Откако ќе доживеат смрт на патник, на членовите на кабинскиот екипаж им се нуди поддршка која вклучува терапија и можност да се одморат неколку дена од работа.
Извор: bbc.com
Фото: Freepik