Задолжителни флуоресцентни елеци и обука пред ловечки испит - усвоен новиот Закон за дивеч и ловство

Собранието на Македонија го усвои Законот за дивечот и ловството. Станува збор за реформски закон со многубројни новости и законско решение усогласено со регулативите на Европската Унија.

Со донесувањето на овој закон се излегува од досегашните концесиски рамки бидејќи дивечот е делумно обновлив ресурс, па во иднина се предвидува дивечот да се дава на користење и управување наместо на концесија како што беше досегашното законско решение, и тоа на период до 20 години. Ваквата измена е во насока на трајноста во одгледувањето, заштитата и неговото користење.

Предност при доделувањето на дивечот во ловиштата на користење, при исти услови, би имале досегашните концесионери на дивечот, а кои најмногу припаѓаат на ловечките друштва.

Новиот Закон за дивечот и ловството предвидува поголеми јавни овластувања за Ловечката федерација на Македонија. Од безбедносен аспект, со новиот закон се предвидува задолжителна обука пред полагањето на ловечкиот испит, посебно во делот на безбедноста при ловот. Понатаму со новиот закон се предвидува одредба со која флуоресцентните маркер-елеци стануваат задолжителни при лов на дивеч.

Новост е и тоа што ловната сезона на дивата свиња започнува порано, односно се предвидува да започне на 1 мај, а се лимитира бројот на дозволен застрел по ловец на ден за одделни видови дивеч.