Неверојатно видео со висока резолуција прикажува како изгледа кометата Неовајс од вселената

На 5 јули астронаут на НАСА успеа да направи прекрасна фотографија, од прозорецот на Меѓународната вселенска станица, од најновиот космички спектакл.

Неодамна откриената комета Неовајс се искачи над хоризонтот пред зори.

- Непосредно пред изгрејсонцето, кометата беше видлива во тој краток временски период кога сè уште беше близу до Сонцето, но Сонцето сè уште беше скриено од Земјата - вели Боб Бенкен, астронаут на НАСА кој неодамна се приклучи на тимот на Меѓународната вселенска станица со ракетата „Кру Драгон“.

Бенкен и неговите колеги направија илјадници фотографии кои графичкиот уметник Сен Доран ги презел од архивата на слики на НАСА и потоа ги претворил во прекрасно видео.

- Земете студен пијалак, исклучете ги светлата, релаксирајте се и пуштете ја снимката на голем телевизор - напиша Доран на својот твитер-профил на 9 јули.

Иако Доран првично споделил верзија на видеото забрзано четири пати, подоцна поставил и видео со ултрависока резолуција на неговиот јутјуб-канал што ја покажува секвенцата во реално време.

Оваа репродукција во реално време им дава на гледачите чувство за тоа како е да се работи на вселенската станица додека летате 400 километри над Земјата со брзина од 28.000 километри на час.



Важно е да знаете дека кометата нема да се врати за брзо време: нејзината долга орбита околу нашата ѕвезда ќе ја врати во близина на Земјата по околу 6.800 години.

Ако сакате да ја видите, треба да се разбудите пред зората и да погледнете кон небото близу до хоризонтот. Од 14 до 19 јули кометата ќе биде најдобро видлива навечер, околу 80 минути по зајдисонце.