Не спиел 11 дена и ги открива последиците: „Добив увид во некоја друга страна на мозокот“

Во 2007 година Тони Рајт од Корнвол, Велика Британија, одлучил да го собори рекордот во лишување од сон. И покрај неговиот ентузијазам и волја, не успеал да постави нов рекорд, но стигнал до неверојатни 266 часа без сон, што е околу 11 дена. Иако првично тоа било наменето да го надмине достигнувањето на Ренди Гарднер од 1964 година и да биде буден 264 часа, било откриено дека во историјата имало подолги обиди, како оној на Финецот Тоими Соини, кој поминал 276 часа без сон.

Рекордот за лишување од сон моментално го држи Роберт Мекдоналд, кој во 1986 година останал буден неверојатни 453 часа или повеќе од 18 дена.

Без разлика дали успеал да го собори рекордот или не, Рајт јавно споделил како се чувствувал во тие долги денови. Според него, по одредено време човекот престанува да чувствува физички замор на ист начин, бидејќи рационалниот дел од умот, одговорен за секојдневното функционирање, почнува да попушта.

- Станувате посвесни за вашата емотивна страна, ја отворате вратата за она што вообичаено го потиснувате - објаснил Рајт.

Додека за многу луѓе долгите периоди на лишување од сон се исцрпувачки и непријатни, Рајт нагласил дека имало моменти кога се чувствувал неверојатно буден и емотивно освежен.

 

Гинисовата книга на рекорди повеќе не запишува вакви подвизи поради опасностите од недостигот на сон.

Долготрајното лишување од сон може да доведе до халуцинации, проблеми со говорот, па дури и до смрт во некои ретки случаи.

Иако Тони Рајт не го држи рекордот за лишување од сон, неговиот експеримент е потсетник за тоа колку е важно спиењето за здравјето на човекот.

Извор: klik.hr

Фото: YouTube screenshot