На рускиот Арктик може да се складираат податоците на светските компании

Рускиот Арктик би можел да стане еден од најголемите светски центри за складирање податоци на меѓународни компании, изјавил академикот Александар Воротников, од име на проектот за развој на Арктикот.



Тој потврдил дека голем број меѓународни компании, како „Фејсбук“, имаат центри со податоци во близина на поларниот круг.

„Русија има голем потенцијал поради природниот студ што е неопходен за работа на центарот за податоци“, рекол Воротников и додал дека поединечни регионални власти им понудиле на инвеститорите територија за организирање складишта за податоци.

Тој рекол дека Русија има и правна основа за развој на тој проект.

На крајот од јуни Русија усвоила закон што го регулира механизмот за соработка помеѓу јавниот и приватниот капитал во ИТ-технологијата.

Инаку, на Арктикот веќе постои складиште во кое се чуваат семиња од растенија.