Навистина штитат: Благодарение на маските, фризерки што имале Ковид-19 не заразиле ниеден од 140 клиенти

Носењето маски доби нова поддршка од истражувања кои покажаа дека фризери од Америка не ја пренеле болеста на ниеден од 140 клиенти што ги примиле во период од неколку дена кога биле заразни и развиле симптоми.

Американскиот центар за контрола и превенција на болести опиша случај во кој носењето маски го спречи ширењето на Ковид-19.

Фризерка од Спрингфилд, Мисури, развила респираторни симптоми на 12 мај, но продолжила да работи до 20 мај, кога добила позитивен тест за Ковид-19. Таа ги игнорирала советите на епидемиологот за самостојно изолирање на 18 мај.


Салонот бил затворен три дена за да се изврши дезинфекција, а епидемиолозите тргнале во потрага по нивните контакти. Тие идентификувале вкупно 139 клиенти што биле во нивниот фризерски салон. Останатиот дел од персоналот бил ставен во 14-дневен карантин.

И двете фризерки при секој контакт со клиентите носеле маски - едната фризерка носела двојна платнена, а другата двојна платнена и хируршка.

Епидемиолозите две недели ги следеле сите 139 клиенти и им понудиле тестирање по пет дена откако го посетиле фризерскиот салон. 67 од нив прифатиле тестирање и ниту еден не бил позитивен, а никој што одбил да се тестира не развил симптоми во периодот од 14 дена, колку што биле следени.

Клиентите биле од двата пола, на возраст од 21 до 93 години. Повеќето носеле маски во текот на нивниот престој во салонот, кој траел од 15 до 45 минути. Повеќето клиенти имале платнени или хируршки маски, а околу 5 отсто Н95 маски.

Научниците веруваат дека за ширењето на вирусот најодговорни се големите капки што излегуваат при кивањето и кашлањето, но и помалите капки што се создаваат кога лицето зборува.

Извор: Zimo.dnevnik.hr