Историјата на селфи-фотографиите датира од пред 185 години
Подготвил:
Тамара Гроздановски
Лектор:
Ивана Кузманоска
Селфи-фотографиите се дел од нашиот дигитален живот. Тие станаа многу популарни по излегувањето на селфи-стаповите и подемот на социјалните мрежи.
Зборот на годината во речниците на „Оксфорд“ за 2013 година беше „селфи“, што беше додаден на нивната веб-страница со дефиницијата: фотографија што некој ја направил од себе, обично фотографирана со паметен телефон или веб-камера и поставена на веб-страница на социјалните медиуми.
Оттогаш, селфи-фотографиите го зацврстија своето место во поп-културата. На некој начин тие станаа уметничка форма, а голем број интернет-водичи нудат совети за тоа како да направите совршена селфи-фотографија.
Иако тоа можеби е една од најпопуларните форми на самоизразување во дигиталната ера, феноменот на ваквото фотографирање датира уште пред појавувањето на мобилните телефони. По само неколку години откако била направена првата позната фотографија во 1826 година од францускиот физичар Џозеф Нисефор Ниепс, првото „селфи“ било направено во 1839 година од Робер Корнелиус, млад хемичар од Филаделфија.
Корнелиус го поставил својот фотоапарат во задниот дел од продавницата за злато на неговото семејство правејќи автопортрет. На задната страна од портретот Корнелиус напишал: „Првата светлосна слика некогаш направена. 1839 година“.
Додека првото селфи има скромно потекло, селфи-фотографијата сега е начин за поврзување и споделување моменти на заедништво со вклучување на личноста што ја слика фотографијата, за разлика од традиционалната фотографија. Со тоа што им дозволуваат на луѓето да станат и фотограф и субјект, селфи-фотографиите направија револуција во начинот на кој се доловуваме себеси.