Најскапиот филм на „Нетфликс“ - критичарите го нарекоа монументална катастрофа

Новиот високобуџетен филм на „Нетфликс“ - „Електричната држава“, со Мили Боби Браун и Крис Прат во главните улоги, важи за еден од најскапите филмови на сите времиња. Иако веднаш се искачи на врвот на листата со најгледани филмови, критичарите воопшто не беа воодушевени, нарекувајќи го „монументална катастрофа“.

Рецензиите за филмот се далеку од позитивни. Магазинот „Слејт“ го опиша како монументална катастрофа, додека „Сандеј тајмс“ го нарече вистинска досада. „Холивуд репортер“ оцени дека е морничаво бездушен, а „Њујорк тајмс“ го осуди како очигледен, нападен и едноставно глупав.

Магазинот „Пејст“ го критикуваше огромниот буџет, опишувајќи го како најбаналниот начин на кој може да се потрошат 320 милиони долари. Според нив, филмот е уметнички стерилизиран и дезинфициран проект што само троши време и пари.

Сепак, не сите критики се негативни. „Емпајр“ смета дека е „лесен за гледање“ и му додели три ѕвезди, додека „Телеграф“ му даде четири ѕвезди.



И покрај слабите оцени, филмот постигна огромен успех на платформата. Неговиот рејтинг на „Ротен томејтос“ е само 15 отсто, што е катастрофален резултат ако се земе предвид буџетот.

Официјалната сума што „Нетфликс“ ја вложи во продукцијата не е потврдена, но често се споменува бројката од 320 милиони долари, што го прави најскапиот стриминг-филм некогаш снимен.

Филмот е ретро-футуристичка авантура сместена во 90-тите години. Приказната ја следи Мишел (Мили Боби Браун), тинејџерка без родители, која тргнува во потрага по својот одамна исчезнат брат Кристофер, по бунтот на роботите. На нејзиното патување ѝ се придружуваат Китс (Крис Прат), шверцер, и неговиот верен придружник, роботот Херман (чиј глас го позајмува Ентони Меки).

Во филмот играат и Ке Хуи Кван, Стенли Тучи, а гласови позајмуваат Вуди Харелсон и Брајан Кокс. Режисери се Ентони и Џо Русо, познати по четири Марвел-филма, вклучувајќи ги мегахитовите „Одмаздници: Војна на бесконечноста“ и „Завршница“.

Филмот е базиран на графичкиот роман на Симон Столенхаг, но според некои критичари, „Нетфликс“ ја промашил суштината на книгата, која го критикува консумеристичкото општество зависно од технологијата.

Извор: Klix.ba
Фото: Screenshot/YouTube