„Тик-ток“ бара од корисниците засекогаш да се откажат од своето право да ја тужат компанијата
Подготвил:
Тамара Гроздановски
Лектор:
Ивана Кузманоска
Веројатно никој не ги чита условите за користење некаква апликација. Поголемиот дел од нас едноставно ги прескокнуваат и нетрпеливо стигнуваат до полето „Се согласувам“ и се согласуваат со сите непрочитани услови.
„Тик-ток“ го имаше предвид тоа кога тивко ги ажурира условите за користење, што сега го оневозможува поднесувањето правен спор против апликацијата.
Промените што „Тик-ток“ тивко ги направи во своите услови посочуваат дека популарната апликација ја помина последната половина од 2023 година подготвувајќи се за бран од правни битки. Можеби најважно, „Тик-ток“ додаде дел во своите услови со кој се наложува сите правни жалби да се поднесат во рок од една година за каква било наводна штета предизвикана од употребата на апликацијата. Условите сега се дека корисниците на „Тик-ток“ засекогаш се откажуваат од правото да бараат какви било постари приговори.
Адвокатите велат дека промените ги отежнуваат правните дејства во време кога федералните агенции детално ја испитуваат апликацијата и се зголемуваат поплаките за одредени функции на „Тик-ток“ кои наводно им прават штета на децата.
Во текот на изминатите неколку години „Тик-ток“ имаше мешан успех во одбраната од тужбите на корисниците поднесени на суд. Во 2021 година мораше да плати 92 милиони долари откако ја реши колективната тужба поднесена во судот во Илиноис во која се тврди дека апликацијата незаконски собирала лични информации од малолетници кои користеле „Тик-ток“. Во 2022 година „Тик-ток“ ја поништи тужбата во Пенсилванија во која се тврдеше дека апликацијата е одговорна за смрт на дете бидејќи нејзиниот алгоритам го промовирал смртоносниот предизвик наречен „Блекаут чаленџ“. Истата година 44 државни јавни обвинители објавија истрага за да се утврди дали „Тик-ток“ ги прекршил законите за заштита на потрошувачите со тоа што наводно ги ставил малолетниците во голема опасност.
Одделот 230 го заштити „Тик-ток“ од поднесување одговорност во тужбата за „Блекаут чаленџ“ од 2022 година, но неодамна судија од Калифорнија пресуди дека платформите на социјалните медиуми - вклучувајќи ги „Тик-ток“, „Фејсбук“, „Инстаграм“ и „Јутјуб“, не можат да ја користат општата одбрана од Дел 230 кога станува збор за безбедноста на децата. Инаку Дел 230 им дозволува на веб-операторите да ги модерираат говорот и содржината на корисникот како што им одговара. Исто така, клучен дел од тој закон е тоа што на платформите им обезбедува имунитет од граѓанска одговорност врз основа на содржина од трета страна, како и имунитет за отстранување на содржината во одредени околности.
Во моментов не е јасно дали новите услови на „Тик-ток“ ќе ги издржат правните предизвици. Омри Бен-Шахар, професор по право на Универзитетот во Чикаго, вели дека „Тик-ток“ би можел да има проблеми да ги брани своите нови услови на суд.
Исто така, „Тик-ток“ ја помина изминатата година спречувајќи ги обидите на законодавците да ја забранат кинеската апликација во САД поради загриженоста дека Кинеската комунистичка партија (ККП) може да ја користи апликацијата за следење на Американците. Досега „Тик-ток“ успеа да го спречи секој обид да се забрани апликацијата нашироко, но тоа не значи дека законодавците планираат да престанат да се обидуваат.
Извор:
rebuild.lidermedia.hr
Фото: Freepik