Златен ретривер им дава утеха на пожарникарите во Калифорнија
Подготвил:
Тамара Гроздановски
Лектор:
Ивана Кузманоска
Бидејќи пожарите продолжуваат да се шират низ Калифорнија, пожарникарите неуморно работат за да ги спречат. Покрај толку застрашувачка и стресна задача, нормално е да бидат анксиозни и вознемирени. Затоа, 2-годишниот златен ретривер им помага да го зајакнат моралот. Керит, кое е овластено терапевтско куче за време на кризи, им нуди утеха на пожарникарите и сериозно си ја сфаќа работата.
Хајди Карман, сопственичка на Керит, објаснува дека првично Керит била тренирана да биде куче-водич за лица со оштетен вид, но поради нејзината топла и прекрасна личност, Хајди одлучила да стане овластено терапевтско куче.
Како што вели Хајди, ретриверот обожава луѓе.
- Уште од рана возраст ми беше јасно дека таа ќе биде одлично терапевтско куче поради нејзината љубов и посветеност кон луѓето - вели Хајди.
Керит поминала тренинзи во организација на „Пет партнерс“ и ги положила прилично лесно. Потоа почнала да работи на одделот за итни случаи во една локална болница во Калифорнија, каде што ги посетувала пациентите, семејствата и вработените во болницата.
- Беше љубов на прв поглед - вели Хајди за непосредната љубов меѓу Керит и пожарникарите со кои се запозна. Набрзо тие почнале да бараат Керит да ги посетува во станиците каде што работат.
Откако пожарите почнале да се шират низ цела Калифорнија, Хајди знаела дека на пожарникарите им е потребна љубовта и поддршката од Керит. Досега таа го однела
кучето во кампот Вудворд Фајр во округот Марин и кампот во округот Фресно - две области што беа најпогодени од пожарите. Кoга ги посетува локациите, Хајди пристигнува со Керит околу 6 часот наутро кога пожарникарите појадуваат и се подготвуваат за 24-часовните смени. Таа шета наоколу нудејќи гушкања и бакнежи на секој што ќе го сретне.
Она што е особено интересно за Керит е дека има неверојатна способност нејзината енергија да се совпадне со енергијата на луѓето.
- Ако пожарникарот е возбуден и легне на земјата за Керит да игра со него, таа ќе има уште поголема енергија и ќе се забавува со него. Ако пожарникарот е мирен, под стрес и повлечен, и Керит ќе биде смирена - вели Хајди.
Златните ретривери се познати по тоа што се најдобрата раса за да станат животни за емоционална поддршка. Тие се исклучително пријателски настроени, трпеливи и приврзани, што ги прави совршени миленичиња особено за децата и за оние на кои им е потребна емоционална поддршка. Освен тоа, тие лесно се тренираат во споредба со другите раси.
Терапевтските кучиња се тренирани да обезбедат удобност и поддршка, но тие не се кучиња-помошници. Терапевтските кучиња посетуваат домови за стари лица, пензионерски домови и слично, за да обезбедат емоционална поддршка. Кучињата-помошници, пак, се обучени да им помогнат на луѓето што имаат физичка потреба.
Извор:
Bored Panda
Фото:
Instagram