Зошто некои луѓе постојано се гладни?

Гладот ​​е нормална реакција на организмот кога не ја консумираме храната во разумни интервали и во режим кој е потребен за оптимална функција на дигестивниот систем. Сепак, постојат луѓе кои се чини дека секогаш се гладни, без оглед на балансираниот распоред на оброци. Кои би можеле да бидат причините?

Глад како резултат на недоволен внес на протеини

Консумирањето доволно количество протеини е исклучително важно за контрола на апетитот. Протеините имаат својства кои можат да ви помогнат да консумирате помалку калории преку зголемување на производството на хормони за ситост и намалување на лачењето на хормони кои го стимулираат гладот. Во неколку студии, луѓето со поголем внес на протеини пријавиле поголема ситост во текот на денот и помалку опсесивни мисли за храна и прејадување.

Недоволно спиење

Спиењето е исклучително важно за нашето здравје. Спиењето е важен фактор за контрола на апетитот бидејќи помага во регулирањето на грелинот, хормон кој го стимулира апетитот. Недоволното спиење доведува до повисоки нивоа на грелин, што може да направи да се чувствуваме погладни. Кога доволно спиеме, имаме и соодветно ниво на лептин, хормон кој го поттикнува чувството на ситост.

Јадеме премногу преработени јаглехидрати

Преработените јаглехидрати значат и внесување помалку влакна, витамини и минерали. Ова е главната причина зошто често можеме да бидеме гладни ако консумираме големи количини преработени јаглехидрати.

Исхрана со мали масти

Мастите играат клучна улога во одржувањето на ситоста, а консумирањето добри масти доведува до ослободување на различни хормони што поттикнуваат ситост. Една студија на 270 возрасни лица со прекумерна телесна тежина покажа дека оние што имале исхрана со малку маснотии имале значително зголемување на желбата за јаглехидрати и храна со висока содржина на шеќер, во споредба со групата што консумирала храна со малку јаглехидрати.

Недоволен внес на вода

Правилната хидратација и соодветниот внес на течности имаат многу здравствени придобивки, вклучувајќи го и здравјето на мозокот и на срцето, како и оптимизирање на перформансите на вежбање. Покрај тоа, водата ги одржува кожата и дигестивниот систем здрави и функционални. Водата, исто така, може да го намали апетитот кога се пие пред оброк.

Гладни сме кога во исхраната недостигаат влакна

Ако во нашата исхрана нема доволно влакна, најверојатно почесто ќе бидеме гладни. Храната со многу влакна ја забавува брзината на празнење на желудникот и варењето трае подолго, што го зголемува чувството на ситост. Покрај тоа, високиот внес на растителни влакна влијае врз ослободувањето на хормоните кои го потиснуваат апетитот.

Стрес

Луѓето што се отсутни, расеани или под стрес кога јадат, немаат нормално темпо на гризење, џвакање и голтање. Истражувањата покажуваат дека луѓето што се под стрес често имаат поголем апетит, потреба од зголемен внес на калории и се посклони кон дебелеење. Исто така, оние што не се свесни за процесот на јадење, по оброкот побрзо чувствуваат глад.

Премногу вежбање

Лицата што често вежбаат согоруваат голема количина на калории, особено ако редовно практикуваат вежби со висок интензитет или се занимаваат со физичка активност подолг период, па затоа ќе бидат гладни побрзо од просечниот човек.

Премногу алкохол

Алкохолот е добро познат по неговите дејства за стимулирање на апетитот, бидејќи може да го поттикне лачењето на хормоните кои го поттикнуваат апетитот, како што е лептинот, особено кога се пие пред или со оброк. Луѓето што пијат алкохол, исто така, имаат поголема веројатност да почувствуваат потреба од повеќе храна со висока содржина на масти или сол.

Употреба на одредени лекови

Одредени лекови може да го зголемат апетитот. Тоа се првенствено антипсихотици и антидепресиви, стабилизатори на расположението и кортикостероиди. Покрај тоа, познато е дека некои лекови за дијабетес влијаат и врз „отворањето“ на рецепторите за глад. Исто така, постојат некои докази дека апчињата за контрацепција имаат својства за стимулирање на апетитот, но сè уште нема доволно истражувања на оваа тема.

Извор: Eklinika
Насловна фотографија: Pixabay