Научниците со отворено барање до Американците: „Не тестирајте домашно направени вакцини за Ковид-19“

Научници имаат отворено барање до граѓаните на САД во нов труд објавен во списанието „Сајенс“ - да престанат да експериментираат со вакцини против Ковид-19 направени дома.

Еден од авторите е Џејкоб Шерков, професор по право на Универзитетот во Илиноис.

- Сите сочувствуваме со идејата дека луѓето сакаат да се заштитат од вирусот. Но луѓето треба да разберат дека секој домашно направен лек нема да помогне, а некои може да бидат и фатални - вели Шерков.


Еден од најпознатите случаи на вакцини против Ковид-19 направени надвор од фармацевтската индустрија е на група истражувачи во градот Кембриџ, Масачустс, водени од генетичарот Џорџ Чрч од „Харвард“. Тие веќе почнале да ја тестираат експерименталната вакцина на себеси, пријателите и на семејството.

Во друг случај, биотехнолошка фирма продавала недокажана вакцина за 400 долари.

Како што вели Шерков, луѓето треба да знаат дека дури и експериментирањето на себеси без официјално одобрување од соодветните власти не е легално. Во трудот се зборува и за потенцијално опасните домашни алтернативи на лековите што се тестираат за болеста предизвикана од новиот коронавирус.

Автор: Џон Кристијан
Извор: futurism.com