„Ракот не е само хороскопски знак“ - изложбата на Сокол Марковски претставува изрази на лица што дознаваат дека се болни

Сликарот Сокол Марковски неодамна пред јавноста ја претстави својата самостојна изложба „Ракот не е само хороскопски знак“. Овој наслов ќе ве натера да застанете, да погледнете за што станува збор, да се подзамислите, да се соживеете и од тој момент да почнете да гледате поинаку на некои работи. Уметничката поставка брои 15 дела, портрети на лица кои дознаваат дека се болни од рак.

- Преку овие дела се обидов да ја доловам внатрешната состојба на човекот кога првпат ќе се соочи со сознанието дека боледува од болеста, вели Марковски.

- Додека ги создавав делата, се обидов да се ставам на нивно место (болните од карцином), поточно да влезам во нивниот психички свет и да ја почувствувам траорноста на нивното живеење - објаснува авторот.

Тој досега многу пати докажал дека е маестрален во сликањето портрети и на познати светски имиња. За оваа изложба вели дека сите 15 лика се плод на неговата имагинација и покрај тоа што појдовна точка за креирањето на изложбата била негова блиска пријателка.

- Имав многу добра пријателка која почина од оваа болест и тоа беше иницијалната каписла, но сметам и дека треба многу повеќе да се зборува на оваа тема, а јас се обидов да зборувам преку сликите - вели авторот.

- Тежина? Не почувствував тежина бидејќи мотивот беше голем и тој секако преовладуваше над тежината, ако воопшто ја имаше - одговара Марковски.

Сликите ги создавал во своето ателје во период од една година. Осум од нив се работени во маслена техника, а седум се мешана техника со дигитален принт. Насликаните ликови гледаат продорно и како секој да сака да ја раскаже својата приказна...

- Посетителите беа воодушевени од делата и заедничката нитка им беше дека сум успеал да ја доловам емотивноста на ликовите - вели уметникот.

- Делата успеваат да проникнат во длабочината на размислата и да допрат до срцевината и суштественото во поимањето на страдањето какао неразделен феномен во егзистирањето на секоја единка, а во овој случај посветено на лицата соочени со спознавањето на една тешка и неизвесна страна на искушенијата со кои се соочени, како и многубројните фази низ кои минуваат - истакна Виолета Калиќ, стручен соработник за визуелни уметности, дизајн и архитектура во Домот на култура „Кочо Рацин“ Скопје по повод оваа изложба.

Желбата и замислата на Марковски е изложбата да отпатува во неколку градови низ државата, но сѐ уште нема прецизирано датуми и локации.

Сокол Марковски е роден на 15 август 1966 година. Тој е ликовен педагог-сликар, со завршена академија во класата на професор Јован Шумковски. Има реализирано самостојна изложба во Сплит (Хрватска) во 2016 година, како и заедничка изложба во КИЦ – 2019 година.