Научниците успеале да снимат раѓање на ѕвезден систем

Астрономите постојано нè изненадуваат со неверојатни снимки од вселенските пространства. Денешната генерација на астрономи имаат можност први да ги видат сликите од црните дупки, далечните галаксии и слично.

Сега експертите успеале да снимат уште една неверојатна фотографија - почетокот на раѓањето на еден ѕвезден систем. Со помош на телескопот што се наоѓа на Европската јужна опсерваторија, наречен „Многу голем телескоп“ (VLT), научниците успеале да ги фатат индикациите за создавање на системот на една млада ѕвезда.

Околу ѕвездата наречена „Аб Ауригае“ се наоѓа густ диск прашина и гас во кој астрономите воочиле исакната спирална структура со подрачје на кое веројатно настанува планета. Оваа снимка би можела да биде првиот доказ за создавање на младата планета - пишуваат научниците од Европската јужна опсерваторија.

- Досега беа идентификувани илјадници егзопланети, но малку се знае за тоа како тие се формираат - вели водечкиот истражувач, астрономот Ентони Бокалети од Универзитетот ПСЛ во Франција.


Досега астрономите не биле во можност да снимат доволно остри слики од такви дискови за во нив да забележат „задабелување“ што би можело да укаже на раѓање на планети.

На најновите снимки може да се види јасен спирален диск прашина околу ѕвездата „АБ Ауригае“ која е оддалечена од нас 520 светлосни години. Спиралното формирање од овој вид укажува на присуство на планета во создавање што создава нарушување во дискот во форма на бранови. Како што планетата се врти околу матичната ѕвезда, овој бран се претвора во спирален крак.

Светлата област што се наоѓа во близина на центарот на „Ауригае“ е едно од таквите места на кои веројатно настанува планетата. Се наоѓа на слична оддалеченост од матичните ѕвезди како што Нептун е оддалечен од Сонцето.