Дали најпопуларната серија на „Нетфликс“ е базирана на вистински настан? Авторот открива детали

Новата криминалистичка драма „Адолесценција“ на „Нетфликс“ ги освои гледачите низ светот, вклучувајќи го и регионов.

Критичарите ја пофалија серијата, публиката е воодушевена, но сите го поставуваат истото прашање – дали оваа вознемирувачка приказна е заснована на вистински настан?

Што ја инспирирало оваа серија?

Иако „Адолесценција“ не е директно базирана на вистинска приказна, авторот Стивен Греам открива дека инспирацијата ја добил од растечката епидемија на убиства со нож во Обединетото Кралство.

- Бев шокиран. Си помислив: „Што се случува? Во какво општество живееме кога момче смртно прободува девојче? Што довело до овој настан?“ А потоа, тоа повторно се случи. И уште еднаш. И уште еднаш. Навистина сакав да го потенцирам овој проблем и да го поставам прашањето: „Зошто ова се случува денес? Што не е во ред со нас? Како стигнавме до овде?“ – додава тој.

Што велат статистиките?

Според податоците на Канцеларијата за национална статистика, 83 отсто од убиствата на тинејџери во периодот 2023–2024 година биле извршени со нож. Во текот на таа година во Англија и Велс (без Манчестер) биле регистрирани околу 50.500 кривични дела поврзани со остри предмети, што претставува зголемување од 4,4 отсто во споредба со претходниот период. Малолетниците на возраст од 10 до 17 години биле одговорни за околу 17,3 отсто од овие кривични дела.

Косценаристот Џек Торн додава дека како што напредувал процесот на создавање, тој, Греам и Филип Барантини биле фасцинирани од феноменот на „машкиот бес“ и почнале да се преиспитуваат себеси како мажи, татковци, партнери и пријатели.



- Ова беше патување на кое никогаш порано не сум тргнал како сценарист, и истовремено беше застрашувачко и возбудливо, бидејќи чувствував дека навистина имаме нешто важно да кажеме - вели Торн.

Серијата истражува со какви притисоци се соочуваат тинејџерите во дигиталната доба и поставува клучни прашања за тоа како општеството ги обликува младите и кои се последиците од игнорирањето на овие проблеми.

Дејствието на серијата

„Адолесценција“ ја следи приказната за 13-годишниот Џејми Милер (Овен Купер), кој е уапсен за убиството на негова соученичка. Стивен Греам, еден од креаторите на серијата, го толкува ликот на неговиот татко, Еди Милер.

Еден од најинтригантните аспекти на серијата е тоа што секоја од четирите епизоди е снимена во еден непрекинат кадар, при што настаните се одвиваат во реално време.

Мини-серијата, составена од четири епизоди, е дело на Стивен Греам, Џек Торн и Филип Барантини, а еден од извршните продуценти е Бред Пит.

Извор: Index.hr
Фото: Screenshot/YouTube