„Виртуелни слушалки“ - не мора да ги носите, да ги полните или да ги поврзувате со уред

Слушалките, безжични или со жица, преку уво или во уво, станаа незаменлив дел од секојдневниот живот. Без разлика дали ги користиме за разговори на паметен телефон, слушање музика или гледање мултимедијални содржини, сите научивме да ги користиме.

Но, што ако можете да ја слушате вашата омилена песна или поткаст дури и во најголемиот метеж без да ви требаат слушалки?

Истражувачите од колеџот „Пен Стејт“ тргнале токму во оваа насока развивајќи ги таканаречените „звучни енклави“ - простори во кои личноста или личностите можат да слушнат конкретни звуци, без тие звуци да ги слушне некој околу нив. Дури и ако луѓето се во затворен простор, како возило или стојат директно пред извор на друг звук, оваа технологија би им овозможила да слушнат сосема поинаков звук.

Во една студија истражувачите предводени од професорот по акустика Јун Џинг објасниле како емитирањето на два нелинеарни ултразвучни зраци создава „звучни енклави“, простори каде што звукот може да се воочи само во одредената точка на пресекот на двата ултразвучни зраци.

-Ние користиме две ултразвучни сонди спарени со акустична метаповршина, кои испуштаат самосвиткувачки зраци, кои се сечат на одредена точка. Човек што стои на тоа место може да го слушне звукот, додека секој што стои во близина не го слуша - објаснил професорот Џинг.
Ултразвучните бранови патуваат на две различни фреквенции, по патека во форма на полумесечина, додека не се вкрстат.
Ниту еден зрак, сам по себе, не се слуша. Само кога овие зраци се сечат, создаваат локална нелинеарна интеракција која создава звук. Зраците можат да ги заобиколат пречките, како што се човечките тела, за да стигнат до одредена точка на пресек.

- За да го тестираме системот, користевме симулирана кукла за глава и торзо со микрофони во ушите за да го имитираме она што човекот го слуша на точките на патеката на ултразвучниот зрак, како и трет микрофон за скенирање на пресечната област. Потврдивме дека звукот не се слуша никаде на друго место освен на прекрстувањето, или она што ние го нарекуваме енклава. Во суштина создадовме виртуелни слушалки. Некој во звучна енклава може да слушне нешто што е наменето само за него - ова овозможува создавање звук и тивки зони - објаснил првиот автор на истражувањето, Џиа-Син Жонг.

Засега, истражувачите можат далечински да пренесуваат звук на околу еден метар од саканата цел, а јачината на звукот е околу 60 децибели, што е еквивалентно на јачината на говорот. Сепак, истражувачите велат дека растојанието и волуменот може да се зголемат доколку се зголеми интензитетот на ултразвукот.

За сите оние на кои слушалките им пречат или едноставно не сакаат ништо да им ги покрива или да им влегува во ушите, ова би можело да биде одлично решение.

Извор: zimo.dnevnik.hr

Фото: Freepik