Новиот филм на Леонардо ди Каприо се снима во тајност, но краткиот трејлер открива многу

Конечно се појави првиот краток трејлер за филмот со наслов „Битка по битка“ (англ. One Battle After Another).

Филмот е мешавина од акција, комедија и научна фантастика, а актерската екипа е импресивна.

По освојувањето на „Оскарот“ во 2016 година за „Повратник“, холивудската ѕвезда Леонардо ди Каприо се појави во само три главни улоги: „Си било еднаш во Холивуд“, „Не гледај нагоре“ и „Убијците на цветната месечина“. Сега, по последниот филм на Мартин Скорсезе од 2023 година, Лео се подготвува за нов хит.

Новото остварување на режисерот Пол Томас Андерсон беше мистериозно претставено во кратко видео. Она што може да се забележи се сцени на интензивна акција, ликови кои пукаат со различно оружје, а меѓу нив е и Тејана Тејлор, која во филмот глуми трудна жена што користи автоматска пушка.

Во тизерот, кој трае околу 20 секунди, се слушаат само две реченици: „Што ќе направиш во врска со ова бебе?“ и „Баш кога ќе помислиш дека сè е под контрола...“

Иако нема одговор, тизерот остава впечаток дека ликот на Ди Каприо ќе ги преземе работите во свои раце.

Деталите за новата улога на Ди Каприо сè уште се држат во тајност. Насловот на филмот бил откриен дури на тест-проекција во јануари оваа година. Според некои извори, станува збор за слободна адаптација на романот „Вајнленд“ од Томас Пинчон, објавен во 1990 година. Интересно е што режисерот Андерсон веќе има искуство со адаптација на делата на овој писател со оглед на тоа што во 2014 година го сними „Скриена мана“ (англ. Inherent Vice) со Хоакин Финикс.

Во филмот, покрај Ди Каприо и Тејлор, ќе глумат и оскаровците Шон Пен и Бенисио дел Торо, како и Реџина Хол. Филмот вешто ги комбинира елементите на акција, комедија и научна фантастика.



Извор: miss7.24sata.hr
Фото: Screenshot/YouTube