Парите за студентски оброк ги нема, надлежните ветуваат дека ќе ги исплатат по административните проверки

Вториот рок за аплицирање за бруцошите траеше до 31 октомври и во тек е разгледување на пристигнатите апликации, како и административна проверка на податоците од страна на други институции, по што секој што аплицирал ќе биде известен за донесената одлука преку системот e-uslugi.mon.gov.mk, велат од МОН

Студентите запишани во прва година што аплицирале за субвенциониран студентски оброк сѐ уште не добиле информација дали и кога ќе ги добијат парите. Некои од нив, како и нивните родители, реагираа до нашата редакција затоа што не добиле никакви информации, а од Министерството за образование и наука (МОН) појаснуваат дека во моментов се прават административни проверки, по што секој кандидат ќе биде известен за донесената одлука.

- Образложението на надлежните е дека се прават проверки на документите со кои аплицираа студентите. Не е јасно зошто се прави двојно проверување на податоците кога истите документи студентите ги поднесоа и при упис на факултет. Со самото тоа што факултетот ги примил и запишал, и им издал индекс, и со самото тоа што тие потпишаа изјава за веродостојност на податоците, потврдиле дека сите документи се веродостојни и се проверени од самите факултети. И тоа треба да биде доволен доказ, а не сега да има дополнителна проверка од повеќе институции и на тој начин да се одолжува постапката - вели родител на бруцош на УКИМ.


- Вториот рок траеше до 31 октомври и во тек е разгледување на пристигнатите апликации, како и административна проверка на податоците од други институции, по што секој што аплицирал ќе биде известен за донесената одлука преку системот e-uslugi.mon.gov.mk. На сите студенти што го остварија правото на субвенциониран студентски оброк во првиот рок од повикот, односно тоа се 18.105 студенти, средствата веќе им се исплаќаат на трансакциските сметки - информираат од Министерството.

Неодамна, Ева Цветковска, претседател на Универзитетското студентско собрание при УКИМ, за Факултети.мк кажа дека колку и да има критики за начинот на реализација на проектот субвенциониран студентски оброк, сепак, добро е тоа што барањето од надлежните е прифатено.

- Имаше проблеми од административната страна. Беа вмешани УЈП, Агенцијата за вработување, МОН, па се случуваат некои проблеми при реализацијата. Свесни сме дека администрацијата е закржлавена, но наша беше иницијативата да се воведе студентскиот оброк и тие ја прифатија, што е во ред. Значи, имаат слух за студентите - рече Цветковска.

Субвенционираниот студентски оброк е системско решение уредено со закон со кое на младите значително им се олеснува животот во текот на студирањето, односно добиваат по 2.400 денари 9 месеци во годината, наменети за купување здрави оброци.

Право на оваа финансиска поддршка имаат сите редовни студенти запишани на додипломски студии на државни и приватни високообразовни установи кои се државјани на Македонија и кои не се во редовен работен однос, не се регистрирани како индивидуални земјоделци и немаат месечен приход по која било основа поголем од минималната нето-плата во тековната година.