Студентки од Архитектонски, инспирирани од „Медена земја“, дизајнираа уникатен прозорец и освоија награда

Пале Јанева, која е петта година, и Бојана Станковска, која е втора година на студии, веќе подолго време се пријателки, а од годинава и цимерки

Пале Јанева и Бојана Станковска, студентки на Архитектонскиот факултет во Скопје, добија прва награда за најдобар дизајн на облик на рамка за прозорец на конкурсот кој факултетот го организира со германската компанија за производство на прозорци и прозорски профили „Века“.
- Бевме, всушност, инспирирани од пчелиното саќе, ќелијата во која пчелите престојуваат. Ние не направивме само прозорец, туку внесовме и дополнителна содржина, рамката содржи и место каде што може да седнете и да се одморите и релаксирате - вели Бојана.
Пале објаснува дека во филмот видела многу јасни кадри за начинот на кој се одгледуваат пчелите.
Она што е уникатно кај овој прозорски елемент е што отпечатокот на многуаголникот се мултиплицира на ѕидната површина, пробиена од неговите извлечени волумени кои од надворешна страна симулираат поединечни пчелични ќелии. Новосоздадениот простор околу прозорците добива функција на интимна зона за одмор. Прозорските крила можат да бидат фиксни или да се отвораат според некоја од наведените опции.
Пале, која е петта година, и Бојана, која е втора година на студии, веќе подолго време се пријателки, а од годинава и цимерки. Извесен период Пале ѝ била демонстратор по еден предмет на Бојана.
Таа и сега е демонстратор на факултетот, по предметот Архитектонски конструкции 3. Нема планови за иднината во врска со останување на факултетот како иден асистент, но ѝ годи интеракцијата со студентите и не ја исклучува оваа можност.
- Таква ни е наставата, имаме многу ангажмани на факултет, но цело време сме заедно сите студенти, учиме едни од други. Во мали групи сме, па професорите добро нè познаваат. Ова навистина ме исполнува, па не ми пречи што по цел ден сме на факултетот - вели Бојана.