Силен земјотрес ја потресе Индокина, се урна облакодер во Бангкок, владее целосен хаос и паника
Сведоци го опишуваа земјотресот почувствуван во Бангкок.
- Светлата почнаа да се нишаат, прозорските стакла се тресеа, а сите побрзаа надолу за да ја евакуираат зградата. Немаше предупредување - велат тие.
Службите за итни случаи соопштиле дека има 50 луѓе во зградата што се урнала во Бангкок. Националниот институт за итна медицина соопштил дека 43 лица се заробени таму, а седум се повредени. Очигледно се работи за градежни работници.
Тајландскиот премиер Паетонгтарн Шинаватра прогласи вонредна состојба во Бангкок.
„Скај њуз“ објавиле дека се регистрирани два земјотреси во Мјанмар, според прелиминарните извештаи на американските геолошки експерти. Првиот бил посилен, со јачина од 7,7 степени, а 12 минути подоцна следувал земјотрес со јачина од 6,4 степени.
Жител на Јангон во Јужен Мјанмар изјавил дека земјотресот траел неколку минути.
- Многу се тресеше и траеше 3-4 минути. Зградата во која живеам беше многу нестабилна, не можевме да телефонираме околу половина час по земјотресот, но интернетот сепак работеше и нема струја - истакнал тој.
На социјалните мрежи се споделуваат снимки на кои се гледа како земјотрес тресе облакодер во Бангкок, а базенот од покривот на облакодерот се излева како водопад. Претходно „Ројтерс“, повикувајќи се на Германскиот истражувачки центар за геонауки (ГФЗ), објави дека земјотресот бил со јачина од 6,9 степени. Агенцијата, во меѓувреме, пренесе извештај на УСГС со јачина 7,7.
Земјотресот се случил на 16 километри северозападно од градот Сагаинг околу 14:20 часот по локално време, соопштиле од УСГС.
Во главниот град на Мјанмар, Најпидау, улиците се деформирани од земјотресот, а парчиња покриви паднале од зградите, објавија новинарите на АФП.
Силни потреси се почувствувани во соседен Тајланд, предизвикувајќи паника во Бангкок каде што се евакуирани канцелариите и продавниците.
- Слушнав бучава додека спиев, па истрчав од зградата најбрзо што можев во пижами - изјавил жител на вториот град во земјата, Чианг Маи, популарна туристичка дестинација позната по своите храмови.
Потресите биле почувствувани и во северниот и централниот дел на Тајланд. Некои услуги на метрото се суспендирани во Бангкок.
Тајландскиот премиер Паетонгтарн Шинаватра веднаш најави свикување „итен состанок“.
Други потреси се почувствувани и во кинеската провинција Јунан (југозапад), објави кинеската управа за земјотреси, која забележала земјотрес со јачина од 7,9 степени.
Земјотресите се релативно чести во Мјанмар, каде што шест земјотреси со јачина од 7 или посилни се случиле помеѓу 1930 и 1956 година во близина на раседот Сагаинг, кој поминува од север кон југ низ центарот на земјата.
Во 2016 година земјотрес со јачина од 6,8 степени според Рихтеровата скала го погоди античкиот главен град Баган во централниот дел на земјата, при што загинаа три лица и предизвика уривање на ѕидовите на храмот во туристичката дестинација.
Во ноември 2012 година земјотрес со јачина од 6,8 степени според Рихтеровата скала го погоди централниот дел на земјата, при што загинаа 26 лица, а стотици беа повредени.
Лошата инфраструктура, несоодветните здравствени услуги, особено во руралните средини и неконтролираниот урбан развој, го направија населението во населените места особено ранливо на природни катастрофи, велат експертите.
- Улиците се полни со возила на полиција и брза помош, а Бангкок е во целосен хаос. Пешаците се движат по тротоарите надвиснати од огромни облакодери на патот, додека возилата за итни случаи и полициските возила се обидуваат да се пробијат.
Ситуацијата е полоша поради тоа што во Бангкок сега е попладне и е страшно топло, околу 36 степени. Околу нашата локација има голем број интервенции бидејќи многу луѓе се разболеле. Многумина од нив во паника истрчаа од зградите, не понесоа ништо со себе, ниту чевли, мобилни телефони, пари и слично – известуваат новинарите.
Судејќи според сликите, штетите по разорниот земјотрес се огромни.
Извор: jutarnji.hr
Фото: Platform X