Апликација го преведува мјаукањето на мачките во зборови што можеме да ги разбереме
Подготвил:
Тамара Гроздановски
Лектор:
Ивана Кузманоска
Поранешен инженер на „Амазон“ бара одговор на прашањето што го имаат речиси сите сопственици на мачки - што се обидува да ми каже мојата мачка?
Хавие Санчез, кој работел на „Амазон Алекса“, сега е проектен менаџер во технолошката компанија „Аквелон“. Тој развива апликација наречена „Мјеуток“, која ветува дека ќе ги преведе мјаукањата на мачката во нешто што луѓето можат да го разберат.
- Не е јазик. Тие не споделуваат зборови и не комуницираат едни со други. Мачките никогаш не си мјаукаат меѓусебно - вели Санчез.
Фото: Pixabay
Преку истражување, Санчез и неговиот тим откриле дека мачките честопати имаат една од деветте различни намери што се обидуваат да ги пренесат кога ви мјаукаат, и секоја порака има свој вид мјаукање.
Користејќи го своето искуство со „Алекса“, и на ова истражување Санчез работи на декодирање на мјаукањето во фразите што мачките се обидуваат да ги пренесат, на пример, „гладен сум“ и „чувствувам болка“. Сопствениците на мачки што ќе ја преземат апликацијата можат да ги снимаат мјаукањата на своите мачки и потоа да добијат превод на звукот, а постои можност и за приспособување и обука на апликацијата за да ги научи уникатните вокализации на нивното милениче. Исто така, сопствениците можат да дадат повратни информации за точноста на преводите на апликацијата.
Фото: Меоwtalk
- Користејќи машинско учење, апликацијата моментално ги преведува мјаукањата на вашата мачка во една од деветте општи намери на мачките; овие девет намери претставуваат расположенија на
мачките и состојби на умот. Но, секоја мачка има и своја единствена вокализација и вокабулар на мјаукање што ги надминува овие девет општи намери. Можете да ја обучите апликацијата да го научи уникатниот вокабулар на мјаукањата на мачката - пишува во описот на апликацијата.
Апликацијата сè уште е во фаза на развој и постојано се усовршува и ажурира, но прототипот е достапен и за „Ајос“ и за „Андроид“ телефони. Санчез се надева дека апликацијата ќе се покаже како успешна и дека тој и неговиот тим на крајот ќе можат да развијат ремче што ќе ги преведува мјаукањата на мачките како да зборуваат.
Извор:
People.com
Фото: Freepik