Шарените балкони за „шпионирање на соседите“ се заштитен знак на оваа држава и кријат интересна приказна
Подготвил:
Тамара Гроздановски
Лектор:
Ивана Кузманоска
Ако сте љубители на сонцето, Малта е идеална дестинација што ќе ве воодушеви. Дури и во зима температурата ретко паѓа под 10 Целзиусови степени. Со рајски плажи, кристално чисто море, величествената катедрала „Свети Јован“, селото на Попај и други интересни места, Малта изобилува со атракции. Но, една од најнеочекуваните и најфотографираните карактеристики на овој медитерански остров се шарените, затворени балкони, кои ќе ги сретнете на секој чекор.
Очите на улицата
Бели, жолти, црвени, сини, зелени. Овие традиционални дрвени балкони изгледаат како очи што внимателно следат сè што се случува на улицата. Ги има во сите постари делови на градовите и селата, а особено се впечатливи во главниот град Валета. Туристите се фасцинирани од нивниот изглед, но уште поинтересна е приказната што ја кријат.
Овие балкони, познати како „муксрабија“, своето потекло го влечат од арапската култура, која оставила длабок белег врз Малта. Првобитно служеле како дискретно место од каде што станарите можеле да набљудуваат што се случува надвор, без да бидат забележани. Биле нешто како „шпионка“, што овозможувала поглед кон улицата без изложување на љубопитните погледи на минувачите. Се проценува дека најстарата зачувана „муксрабија“ на Малта датира од 1300-1400 година.
Првичната намена на овие балкони била да овозможат циркулација на воздухот и да ја одржуваат свежината во домовите, но подоцна станале симбол на приватност и заштита, особено за жените.
Малтежанките некогаш носеле традиционална облека што ги покривала од глава до пети, а балконите им овозможувале да го набљудуваат надворешниот свет без да бидат видени.
Со текот на времето, овие балкони се менувале со различни архитектонски стилови. Некои од најмалите, со само три стаклени прозорци, може да се најдат во тесните, живописни улички на Валета. Денес, овие балкони не служат само за набљудување, туку се и одлично место за сушење облека, одмор со кафе и книга или како минијатурни зимски градини со растенија.
Малтешките власти ја препознале вредноста на овие балкони и денес нивната оригинална форма е заштитена. При реновирање на старите градби, задолжително е да се зачува автентичниот изглед на балконите.
Различните стилски модификации низ вековите создадоа разновидни модели – од камени и железни до оние со дрвени или алуминиумски елементи. Но, нивната главна функција остана иста: да внесуваат светлина и да создаваат впечаток на дополнителен простор.
Иако денес веќе не служат како шпионски засолништа, шарените балкони на Малта остануваат совршено место за „шпионски поглед“ кон улицата и размена на новости со соседите. На крајот на краиштата, кој не сака понекогаш малку да „пошпионира“, со или без балкон.
Извор:
Putnikofer.hr
Фото:
Instagram