Како да правите разлика помеѓу анксиозност и депресија?

Разликата помеѓу анксиозноста и депресијата е значајна, а симптомите не смеат да се игнорираат, вели украинскиот психолог Јулија Медведева.

Во секојдневието исполнето со стрес често е тешко да се избегнат чувствата на страв и напнатост, а промените во расположението се случуваат неколку пати во текот на денот.

Двата најчести термини кога станува збор за менталното здравје се анксиозност и депресија, но овие состојби се суштински различни.

Украинскиот психолог Јулија Медведева објаснува како најлесно да се направи разлика помеѓу нив.

- Анксиозноста е природен одбранбен механизам за преживување. Мали дози на страв ја активираат нашата способност за донесување одлуки и преземање активности. И што е најважно, нормалната анксиозност секогаш е поврзана со конкретен предизвикувач - објаснува таа.

Но, состојбата е поинаква кога анксиозноста е постојана и значително го нарушува квалитетот на секојдневниот живот.

Психологот нагласува дека долготрајната анксиозност, особено ако не можете да се ослободите од стравот, може да премине во депресија.

Симптоми што укажуваат на ризик од депресија

- Наутро и навечер чувствувате силна тага и исцрпеност, а обичните задачи, како миење заби или местење на креветот, ви изгледаат премногу напорни.

- Чувствувате постојан замор и силна внатрешна напнатост, проследени со опсесивни негативни мисли од кои не можете да се ослободите.

- Дури и најмалите нешта или постапки на другите ве нервираат, што може да доведе до нарушување на односите со луѓето околу вас.

- Почнувате да извршувате повторувачки дејства, како преместување предмети, често миење на рацете или имате несоница.

- Во главата ви се вртат исти фрази или мелодии, а чувството на страв од претстојна несреќа е постојано присутно.

Ако препознавате некои од овие симптоми кај себе или чувствувате дека вашето ментално здравје е нарушено, важно е да побарате стручна помош.

Извор: Atvbl.rs
Фото: Freepik