Вистината за виралната фотографија: Импресивнaта глетка од леталото на НАСА не е тоа што мислите
Подготвил:
Тамара Гроздановски
Лектор:
Ивана Кузманоска
НАСА отсекогаш испраќала вселенски летала во непознатото со надеж дека ќе открие нешто ново и возбудливо. Но, како и сè друго, и нејзините мисии некогаш мора да завршат.
Завршувањето на една таква мисија стана вирален хит на „Тик-ток“. Проблемот е што информацијата што се шири не е сосема точна.
Вистината за леталото „Касини“
Лансирана пред речиси 30 години, вселенската сонда „Касини“ беше испратена да го истражува Сатурн, неговите прстени и месечини. Ова беше првата сонда што влезе во орбитата на Сатурн и остана таму речиси 20 години.
Но, нејзината научна мисија заврши во 2017 година, кога НАСА ја насочи кон контролирано уништување, спектакуларен крај наречен „Големото финале“.
Преминувајќи низ опасните региони меѓу Сатурн и неговите внатрешни прстени, „Касини“ го заврши своето последно патување со намерно уривање во атмосферата на планетата. Овој потег спречи потенцијална контаминација на неговите природни сателити, кои сè уште се предмет на интензивни истражувања. Последниот контакт се случи на 15 септември 2017 година.
Фото: NASA
Но, според некои видеа што станаа вирални, Касини наводно испратил последна фотографија додека слетувал на Јупитер.
Фотографијата не е вистинска
Иако сликата што кружи низ интернет изгледа неверојатно, вистината е поинаква.
Во едно видео на „Тик-ток“ со 6,4 милиони прегледи се наведува:
- Последната фотографија што ја направила сондата „Касини“ пред нејзиното уништување во атмосферата на Сатурн прикажува зачудувачки поглед на планетата од далечина од 639.000 километри. Оваа слика, првично црно-бела, подоцна е обоена со црвени, зелени и сини спектрални филтри, а го прикажува осветлениот дел од Сатурн одразен од неговите ледени прстени.
Колку и да звучи неверојатно, ова не е вистина.
Watch on TikTok
Всушност, сликата што се шири е уметнички концепт за последното патување на „Касини“, создаден врз основа на познавањата на НАСА за планетата.
Во ера на лажни вести, ваквите содржини брзо стануваат вирални, а многумина не сфаќаат што всушност гледаат. И покрај тоа, сликата останува импресивна, само не е она за што луѓето веруваат дека е.
Среќа што дел од корисниците посочија на неточноста.
- Постои фотографија што „Касини“ ја направи додека паѓаше во Сатурн. Лесно може да се најде со едноставно гугл-пребарување - напиша еден корисник.
- Ова не е фотографија – ова е уметничка интерпретација. Забавно е што луѓето мислат дека ова е вистинска слика, но сепак е преубава - додаде друг.
Извор:
Net.hr
Фото: NASA