Дали менструалниот циклус навистина влијае врз когнитивните способности на жените?

Иако сериозни состојби како дисменореја и ендометриоза можат да влијаат врз различни способности на жените, се покажало дека менструацијата не ја заслужува репутацијата на состојба поврзана со многу тешкотии.

Истражувањата за влијанието на менструалните циклуси врз состојбата и функционирањето на мозокот кај жените долго време биле спроведувани на мали примероци, ограничени мерки на анализа и, секако, фактот што женското тело било занемарувано во истражувањата за оваа тема.

Според поновите истражувања, истражувачите тврдат дека идеите за влијанието на менструалниот циклус врз когнитивните способности се субјективни и не се поткрепени со научни докази.

Бихевиористот Даисунг Јанг од Универзитетот во Мелбурн спроведе метаанализа на 102 рецензирани научни студии што ги испитувале когнитивните капацитети на жените за време на нивниот менструален циклус.


Истражувањето ги исклучило трудовите што содржеле фактори што можат да влијаат врз резултатите, како што се бременост, инфекции, одредени здравствени нарушувања и рак. Со тоа, истражувачите заклучиле дека добиените резултати ги одразуваат само „основните“ искуства поврзани со менструацијата.

Познато е дека нивото на хормони како естроген, прогестерон и лутеинизирачки хормон варира во различни фази од циклусот. Овие промени ги чувствуваат рецепторите во целото тело, вклучително и во мозокот.

Сепак, разликите во когнитивните способности што ги открил тимот на Јанг биле толку мали и недоследни што се сметале за незначителни. Истражувачите тврдат дека не постојат научни докази кои укажуваат на тоа дека работата на мозокот кај жените зависи од менструалниот циклус.

Суптилни промени и индивидуални искуства

Иако се документирани физиолошки промени во текот на циклусот, нивното влијание врз когнитивните функции е многу суптилно. Можно е и жените да имаат развиени механизми за компензација на овие промени на начини што науката сѐ уште не ги разбира целосно.

Историски гледано, жените често биле ограничувани од погрешното верување дека менструалниот циклус им ја нарушува когнитивната функција. Некои можеби и денес сметаат дека е тешко да се функционира нормално за време на менструацијата поради болките и непријатностите што ги чувствуваат.

Резултатите од истражувањето не ја исклучуваат можноста дека менструацијата може да има поголемо влијание врз когнитивните способности кај некои жени отколку кај други, од причини што не биле опфатени во ова истражување.

Претходни истражувања покажале дека разликите во хормоналните нивоа кај жени со и без предменструален синдром (ПМС) се минимални. Ова укажува дека ПМС е повеќе поврзан со начинот на кој телото реагира на хормоните отколку со нивните нивоа воопшто.

- Нашето истражување може да помогне во разрешувањето на погрешните сфаќања и митовите поврзани со менструацијата, како и во спречување на дискриминаторските практики. Не најдовме научна основа за тврдењето дека когнитивните способности на жените се значително променливи или загрозени за време на менструалниот циклус - заклучуваат истражувачите.

Извор: Rts.rs
Фото: Freepik