Во аквариумот „Кала Гононе“ на Сардинија, Италија, се случил феномен. Ајкула родила бебе во резервоар во кој последните десет години живеела со други женки-ајкули. Ајкулата немала никаков контакт со мажјак, пренесуваат италијанските медиуми.

Ова можеби е првиот ваков пример кај овој вид ајкули. Новородената ајкула била наречена Испера, што значи надеж на сардиниски.

Се претпоставува дека станува збор за случај на партеногенеза, што е асексуално размножување за кое не е потребна сперма за да се оплоди јајце-клетката. Партеногенезата била забележана кај некои рептили, риби и птици што нормално се размножуваат сексуално.


Таа била забележана и кај други ајкули, но никогаш кај овој вид што живее во италијанскиот аквариум, чие латинско име е mustelus mustelus.

Демијан Чапмен, директор на програмата за зачувување ајкули и раи во лабораторијата и аквариумот „Моут марин“ во Флорида, објаснил дека партеногенезата можеби е последен обид за женките да се размножат доколку не може да најдат партнер. Во аквариумите, одвојувањето на машките и женските единки може да го поттикне ова кај женките, но ова е само хипотеза.

Дополнителни анализи на ДНК-примероци од мајката и бебето ќе дадат повеќе информации.

Извор: Interesting Engineering

Фото: Pixabay