Ако одите во Рим, Барселона или Атина во август, веројатно сакате да ја тестирате максималната температура што човечкото тело може да ја преживее. Ако сакате пријатен градски одмор, свртете го компасот кон север. Талин, главниот град на Естонија, лете нуди совршена комбинација од историја, ветре и пријатни 25 степени.
Додека добар дел од Европа во текот на јули и август буквално се пржи на температури што надминуваат 35 степени во термометарот, па и повеќе од тоа - во некои делови на нашиот континент летото изгледа малку поинаку.
Ако оваа година летниот одмор сакате да го поминете активно, во истражување градови или планинарење без капка пот, пред вас се три фантастични европски дестинации каде што живата во термометарот сепак останува на степени што се пријатни, и каде што ќе ви биде топло, но нема едвај да чекате да се најдете во климатизирана просторија.
Планински рај на земјата: Доломити, Италија
Оставете го барањето паркинг на брегот и дајте им шанса на планините. Додека во низините на Италија туристите буквално се топат, па во Фиренца или Венеција луѓето се борат да дојдат до здив, горе на северот, во „прегратката“ на Доломитите, летото изгледа какo од некој СФ филм во кој некој ја фиксирал температурата на совршени 20 до 25 степени.
Што да се прави: Посетете го езерото Лаго ди Браиес. Го знаете она тиркизно езеро со дрвени чамци што нонстоп го гледате на „Инстаграм?“ Е па, во живо е уште подобро. Можете да изнајмите чамец, а ако сте повеќе тип за акција, патеката околу езерото е идеална за лесна прошетка без по пет минути да изгледате како штотуку да сте завршиле маратон. Секако, нема да погрешите ниту ако ги посетите езерата Мисурина и Сорапис, па нема да погрешите дури и ако едноставно се упатите во ова чудо на природата и талкате наоколу...
Ова е Италија, што значи дека храната е сериозна работа. По прошетката задолжително свртете во некоја од планинските колиби на домашни тиролски кнедли од леб и чаша добро локално вино. Погледот од милион евра е вклучен во цената.
Талин, Естонија
Ако одите во Рим, Барселона или Атина во август, веројатно сакате да ја тестирате максималната температура што човечкото тело може да ја преживее. Ако сакате пријатен градски одмор, свртете го компасот кон север. Талин, главниот град на Естонија, лете нуди совршен микс од историја, ветре и пријатни 25 степени.
Што да се прави: Неговото историско јадро е под заштита на УНЕСКО. Прошетајте низ центарот, испијте кафе на плоштадот Раекоја, а потоа задолжително продолжете до поранешниот индустриски комплекс кој локалните хипстери го претворија во „легло“ на дизајнерски продавници, врвна улична уметност и крафт барови.
Бидејќи сте на северот на Европа, деновите во летните месеци траат екстремно долго. Сонцето заоѓа дури околу 23 часот (а изгрева околу 4), што значи дека имате чувство дека денот трае вечно. Идеално за да се испие „уште само едно“ локално пиво.
Остров на вечната пролет: Мадеира, Португалија
Да, можно е да заминете на остров среде Атлантикот, а притоа да не се сварите. Мадеира оправдано ја носи титулата остров на вечната пролет бидејќи благодарение на океанските струи и специфичната положба, летните температури овде ретко кога се над 25 степени.
Што да се прави: Мадеира е рај за луѓето што не можат да седат мирни. Позната е по своите канали за наводнување покрај кои денес минуваат стотици километри пешачки патеки низ прашумата под заштита на УНЕСКО. Ако сакате да се освежите, заборавете на класичните песочни плажи. Овде се оди во Порто Мониз, место познато по фантастичните природни базени формирани во вулкански карпи кои постојано ги заплискува океанот.
Фото: magnific