Новата учебна 2022/2023 година денеска почна и за основците и средношколците во општина Пустец, област Мала Преспа, Албанија.

На почетокот на учебната година со учениците во Пустец беше градоначалникот Пали Колефски кој им посака среќен почеток и многу успех во совладувањето на наставните единици.

-Вам драги ученици и на вашите наставници ви посакувам среќен почеток и успешна учебна година. Посебни честитки до оние кои првпат седнуваат во ученичка клупа - посака Колефски.

За жал, рече тој, продолжува трендот на намалување на бројот на првачињата, но и на вкупниот број ученици.

-Во општината во ученичка клупа за првпат седнаа седум првачиња. Од нив по три се во Пустец и Туминец и едно во Леска. За жал, во оваа учебна година не е запишано ниту едно прваче во останатите шест населени места - изјави Колефски.

Според него, во основно и средно образование настава ќе следат вкупно 109 ученици.

Од вкупниот број, 87 се ученици во основните училишта, додека 22 во гимназијата во Пустец.