До
Г. Абдилаќим Адеми, министер за образование и наука
Министерство за образование и наука
Скопје

Почитуван г. министер,

Тргнувајќи од определбата на државата и мисијата на Универзитетот за квалитетно образование, компатибилно со европското, како и нашата заедничка улога и одговорност во унапредување на образовниот систем и зачувување и развивање на националниот интелектуален и научен потенцијал, а во врска со последните измени во Законот за високото образование и Законот за високообразовните установи за образование на наставен кадар во предучилишното воспитание, основното и средното образование, Универзитетскиот сенат на Универзитетот „Св. Кирил и Методиј" во Скопје, на својата 26 седница одржана на 30.1.2015 година, донесе Одлука да Ви предложи, во најкус можен рок, да иницирате расправа со наставниците, студентите и сите релевантни чинители во процесот на високото образование, заради сеопфатна, стручна и темелна анализа од која ќе произлезе предлог за промени, односно нов закон за високото образование.

Р е к т о р
Проф. д-р Велимир Стојковски

Одговор од МОН

Во однос на денешниот предлог на Универзитетскиот Сенат на Универзитетот “Св. Кирил и Методиј“ – Скопје, доставен до Министерството за образование и наука сакаме да го истакнеме следното:

Министерството за образование и наука е секогаш отворено за дијалог и за аргументирани идеи кои значат унапредување на високото образование и понатамошни реформи кои ќе бидат од интерес за сите чинители во образованиот процес.

Министерството, како што веќе и претходно беше јавно истакнато од наша страна, е подготвено во следниот период да организира процес на сеопфатна, стручна и темелна анализа со сите субјекти во оваа сфера, како и разгледување на најдобри практики и искуства во оваа сфера, процес од кој би можеле да произлезат предлози за реформи и подобрувања во високото образование.

Веруваме дека понатамошното унапредување на квалитетот на високото образование е темелна определба на сите нас и истакнуваме дека предлогот на Сенатот на УКИМ го цениме како конструктивен.

Министерство за образование и наука