Кога министерство за одбрана ќе распише некаков јавен тендер, обично би очекувале преку него да се купува опрема, оружје, технологии поврзани со разни безбедносни аспекти и слично, но овој пат американскиот Пентагон малку изненадува, па зачекори во доменот на дипфејк содржина. Имено, нивната Единица на специјални сили (ЈСОЦ) објавила тендер за набавка на систем, кој може да создаде убедливи интернет личности, онлајн профили на луѓе кои не постојат, со цел истражителите да ги користат на социјалните мрежи и други слични платформи.

Креирањето лажни профили не е нова техника, таа се користи практично во секоја разузнавачка операција или истрага, како и во аматерските истраги на „ОСИНТ“, каде лажните профили се првенствено алатка за намалување на можноста за следење на лицата кои ја водат истрагата. Меѓутоа, она што сега сака да го добие Пентагон е малку пософистициран систем, кој би создавал непостоечки профили, би создал лажни, но убедливи личности, нивните 2Д и 3Д модели на лицето, пакети на „лични“ слики од сите агли и во различни ситуации, а дополнително би требало да може да се избегне откривање на креираната содржина како лажна.

Документите истакнуваат дополнителен услов - системот би требало да може, на барање на корисникот, да создаде слика со многу висока резолуција на лажна личност, со доволен квалитет за да се користи за идентификација од властите, т.е. на лични документи. Сето ова треба да биде достапно во рок од 72 часа од барањето. Со цел евентуално да се измамат системите за верификација на идентитетот, тендерот ја специфицира и опцијата за создавање на 3Д видео, кое би можело да помине како реално, кога некој ќе побара кратко селфи видео за автентикација. Како таков, не треба да се открие како лажен, без разлика дали луѓето или машините ја вршат автентикацијата.

Покрај сликите и видеата на лажни луѓе, алатката би требало да може да го генерира пејзажот според дадената локација, повторно прецизен и веродостоен извор, заедно со придружниот звук, кој би се очекувал во одредена средина. Се чини дека сето тоа им треба на агентите на Пентагон за да создадат лажни онлајн кориснички профили, што е можно поубедливи, и да ги користат, како што велат, за „собирање информации од јавните интернет форуми“.

Порталот „Д Интерсепт“, кој го открил овој документ, го контактирал и експертот за вештачка интелигенција Хајди Калаф од Институтот „АИ Нау“. Таа ги окарактеризирала барањата за оваа технологија на следниов начин:

-Нема други легитимни случаи на употреба освен измама, и вознемирувачко е да се види како американската војска се потпира на употребата на технологија на која тие самите предупредуваат. Тоа само ќе ги охрабри другите војски или противници да направат истото, што ќе доведе до општество во кое е сè потешко да се разликува вистината од фикцијата.

Извор: bug.hr

Фото: Freepik