Инаугурацијата на новиот мексикански претседател Андрес Мануел Лопез Обрадор беше во саботата, а деновиве тој веќе почна со остварување на едно предизборно ветување - продажба на претседателскиот авион.

Имено, тој смета дека приватниот авион што го користел неговиот претходник е претерано раскошен и уште во текот на кампањата вети дека ќе го продаде. Станува збор за „боинг 787-8 дримлајнер“, што владата го купила во 2016 година за 218 милиони долари, а откако бил преуреден за потребите на претседателот, вкупната вредност му се искачила на 239 милиони долари.

Но, во понеделник овој авион ќе одлета до аеродромот во Викторвил, Калифорнија, каде што ќе го чека следниот сопственик.

- Ги продаваме сите авиони и хеликоптери што ги користеа корумпираните политичари - изјави Лопез Обрадор.

Така, покрај претседателскиот, Обрадор ќе продаде и 60 владини авиони и 70 хеликоптери.