Ви претставуваме листа од играни филмови кои се занимаваат со општествената положба на младите, образованието и растењето. Ако не сте гледале некои од нив, топло ви препорачуваме да ги погледнете.

Одлична германска драма/трилер која се занимава со генезата на нацизмот. Средношколскиот професор применува необичен експеримент за на своите ученици да им покаже како е да се живее во диктатура. Но, се` излегува од контрола и експериментот го претвора класот во посебно социјално општество со свои закони, униформи и членови.

Прекрасна драма која се случува во едно средно училиште и раскажува за животот на наставниците и учениците преку очите на Хенри Барт. Хенри е професор на замена, и често ги менува училиштата во кои предава и никаде не останува доволно долго за да развие длабока поврзаност со учениците или колегите. Но, кога доаѓа на неговата нова задача, три жени во него побудуваат чувства - ученичката Меридит, колешката Медисон и Ерика, младата улична проститутка.

Нискобуџетна независна драма за тинејџерите во Њујорк. Протагонистот е Тели, младо момче чијашто цел е да има што повеќе девојки. Иако една од поранешните партнерки му кажува дека е ХИВ позитивна, тој останува бестрашен во неговите намери.

Криминалистичка драма снимена според вистинска случка. Во 1994 година Ерин Грувел станува наставничка по англиски во прва и втора година во средното училиште Вудроу Вилсон во Калифорнија. Училиштето пред доаѓањето на Ерин воведе интеграциска програма која според мислењето на другите наставници го упропастила самото училиште, а некогашните високи академски стандарди се заменети со ученици кои би биле среќни ако воопшто успеат да положат матура.

Уште една одлична драма. Срамежливиот Тод Андерсон оди на училиште каде неговиот постар брат беше еден од најпопуларните ученици. Негов цимер е Нил, бистро и популарно момче кое живее по директивата на неговиот татко. Тие двајца заедно со уште неколку пријатели, го запознаваат професор Китинг, наставник по англиски јазик кој ги охрабрува да се побунат против нивниот статус кво. Секој од нив, на свој начин го прави токму тоа.

Драма снимена според вистинската приказна на 84 годишна селанка, борец против британската колонијална власт во Кенија за време на востанието Мау Мау, што доведува до уште една борба - онаа за правото на образование кои никогаш не можеле да си го дозволат.

Уште една драма снимена според вистинска приказна. Арогантниот наставник Џо Кларк, се враќа како директор во училиште полно со дрога, банди, насилство и урбан очај. И тој одлучува сето тоа да го промени. Со текот на времето неговите необични, но успешни методи доведуваат до конфликт со градските власти кои се закануваат дека ќе ги уништат неговите напори.

Пет средношколци, секој во свој стереотип, имаат доста заеднички теми додека под казна ја поминуваат саботата во библиотеката во нивното училиште. За надворешниот свет тие се Мозок, Спортист, Социјално неприлагоден, Принцеза и Криминалец, но меѓусебно се познати како „The breakfast club“.

Оваа шпанска криминалистичка драма го прикажува влијанието на католичкото образование и сексуалното малтретирање во времето на диктатурата на Франко во текот на животите на двајца долгогодишни пријатели.

Одлична музичка комедија. Пропаднатата рок ѕвезда Девеј Фин е избркан од сопствениот бенд и се соочува со многу долгови и депресија. Тој ја прифаќа работата како заменик наставник, односно ја кради од сопствениот цимер, во едно приватно основно училиште и го претвора одделението во рок ден.