Замислете маица што можете да ја носите со недели, а притоа да не мора да ја ставите во машина за перење алишта. Токму таков производ претстави американската компанија за облека „Херклеон“, чија нова маица привлекува внимание со тврдењето дека може да остане свежа и без непријатни мириси подолго од 30 дена.

„Херкшрт В5.0“ претставува петта генерација од овој необичен производ, а зад нејзиниот дизајн стои комбинација од материјали за кои компанијата тврди дека спречуваат развој на бактерии и задржување непријатни мириси. Иако звучи посебно необично за време на потоплите месеци, производителот наведува дека маицата е наменета и за интензивна секојдневна употреба.

Тајната е во необичната комбинација од материјали

За да го продолжат периодот меѓу две перења, производителите во самата ткаенина успеале да вткаат седум состојки. Меѓу нив се бакар, сребро, цинк, злато и вулкански пепел, додека преостанатите две состојки засега се дел од деловната тајна на компанијата. Материјалите не се само нанесени на површината, туку се интегрирани во ткаенината.


Цена до 79 долари, а пристигнуваат и нови бои

Според информациите што компанијата ги објави во рамките на својата кампања на „Кикстартер“, „Херкшрт В5.0“ би требало да остане свежа подолго од еден месец дури и при интензивно носење. Поради пореткото перење, производителот тврди дека маицата може да трае значително подолго од класичните модели и дека претставува подолгорочна инвестиција.

Најскапата верзија чини околу 79 долари, додека ќе постојат и поприфатливи варијанти. Моделот од 39 долари е наменет за до три дена интензивна употреба без перење, додека стандардната верзија, според тврдењата на производителот, може да издржи до 14 дена. „Херкшрт В5.0“ би требало да биде достапна за испорака на почетокот на ноември 2026 година, најпрво во црна боја, додека за подоцна се најавени тегет, бордо и темнозелена.

Извор: 24sedam.rs
Фото: Screenshot/YouTube