Енергетските компании АД ЕЛЕМ, АД МЕПСО и ЕВН Македонија денеска им доделија нови осум стипендии на најдобрите студенти на Факултетот за електротехника и информациски технологии. За деканот на ФЕИТ, професор д-р Димитар Ташковски, македонското стопанство сè повеќе бара електроинженери како кадар.
- Стопанството уште повеќе бара инженери. Постојано сме сведоци на фактот дека многу наши студенти, уште во школски клупи, почнуваат со работи за домашни или странски компании. Тоа само ја потврдува нашата верба во квалитетот што им го нудиме на студентите и на бизнис-заедницата. Затоа, ФЕИТ продолжува во иста насока и со исто темпо да образова квалитетен кадар кој уште од студентски клупи ќе се вклучи во процесот на производство и дистрибуција на енергија - вели професор Ташковски.

Компаниите помагаат ФЕИТ да ја оствари својата мисија на едуцирање квалитетни кадри преку нивна поддршка со доделување годишни стипендии, за кои месечниот износ е 6.1000 денари.
- АД Електрани на Македонија, како општествено одговорна компанија, сака да вложува во младите луѓе, сака да помогне во продуцирањето кадар, особено од областа на електротехниката и информациските технологии, како и од други области што се барани во стопанството и на кои во иднина уште повеќе ќе почива индустријата, а и целата економија. Бројот на млади луѓе во образовниот процес што ги помагаме е навистина значителен и ние како компанија и како раководство сме горди на тоа и среќни што можеме да дадеме наш придонес - вели Иван Трпески, директор за развој и инвестиции на АД Електрани на Македонија.
Исто така, Сашо Василевски, претседател на Управниот одбор и генерален директор на МЕПСО, потенцира дека и оваа компанија е општествено одговорна.
- МЕПСО е општествено одговорна државна компанија. Нашата декларирана заложба за научен прогрес честопати нè наведува на активности да помагаме иницијативи од стратешко значење, индивидуалци чии образовни квалификации најавуваат прогресивна иднина. Кај раководството на нашата компанија постои апсолутен консензус и желба да се помогне. И помагаме. Kомплетно го либерализиравме приодот кон оваа се надеваме двострана и, пред сè, искрена академска активност да стимулираме студенти на ФЕИТ во својот интелектуален развој да го подигнат прагот на личните можности, во индексите да впишуваат уште повисоки квалификации и оценки, по студиите да се стават на располагање на државата и да станат дел од нејзиниот енергетски стручен потенцијал. За таквите, успешните, вратите на МЕПСО ќе бидат отворени секогаш - изјави Василевски.

Сашо Стојкоски, член на Управниот одбор на ЕВН Македонија, во своето обраќање пред студентите ја потенцира традицијата на доделување стипендии на ФЕИТ.
- ЕВН Македонија, традициoнално, доделува стипендии за најуспешните на ФЕИТ. Доделивме околу 40 стипендии, половина од стипендистите се веќе наши колеги, работат, напредуваат, се развиваат во професионалци подготвени да се носат со сите предизвици во работата. Некои од нив веќе работат на позиции каде што имаат можност да одлучуваат за многу процеси во компанијата. Европското искуство и иновативноста се карактеристики на ЕВН, но она што дополнително ќе ја зголеми нашата вредност се младите образовани и стручни кадри. Тие се новата енергија за подобра иднина. Затоа, вратите на ЕВН се отворени за младите со нови идеи и енергија - рече Стојкоски.